Aholi bandligini ta’minlash masalasi deputatlar nazoratida

Mamlakatimiz ijtimoiy-iqtisodiy siyosatining asosiy maqsadi ish o‘rinlarini ko‘paytirish va kambag‘allikni qisqartirishdir. Keyingi yillarda yurtimizda aholi bandligini ta’minlash, yoshlar va xotin-qizlarni kasb-hunarga o‘rgatish, ularning daromadlarini izchil oshirish bo‘yicha ulkan ishlar amalga oshirilmoqda.

Oliy Majlis Qonunchilik palatasi Spikeri o‘rinbosari Z.Ibragimova boshchiligidagi bir guruh deputatlar Xorazm viloyatining Urganch shahrida bo‘lib, Yoshlar bandligini ta’minlash borasida amalga oshirilgan ishlar holati bilan tanishdi.

Uchrashuvlar davomida deputatlar hududda aholi bandligini ta’minlash bo‘yicha keng qamrovli ishlar olib borilayotganiga guvoh bo‘lishdi. Jumladan, "Beshmergan" mahallasida yashovchi D. Sardorovga avtomashina yuvish jihozlari, D.Sultonovga avtotransport vositalarini tuzatish anjomlari "Yoshlar daftari" jamg‘armasidan subsidiya asosida olib berilgan.

Bugungi kunda yoshlar o‘zini-o‘zi band qilish orqali bandligini ta’minlagan holda doimiy daromadga ega bo‘lmoqda. Muloqotlar chog‘ida yigit-qizlar keyingi yillarda yurtimizda amalga oshirilayotgan islohotlarni qo‘llab-quvvatlab, davlatimiz tomonidan berilayotgan imkoniyatlardan mamnun ekanliklarini bildirdi.

Shuningdek, deputatlar Urganch shahrida 2023 yilning o‘tgan davri mobaynida yangi ish o‘rinlarini yaratish va aholi bandligini ta’minlash borasida amalga oshirilgan ishlar holatini o‘rganib, hududdagi Monomarkazda tashkil qilingan ishlar bilan yaqindan tanishdilar.

Shu bilan birga, "Ashxobod" mahalla fuqarolar yig‘inida huquqbuzarliklarning oldini olish va profilaktikasini ta’minlash hamda jinoyatchilikka qarshi kurashish borasida olib borilayotgan ishlarni o‘rgandilar.

Ma’lum bo‘lishicha, bu yerda jinoyatchilikni jilovlash va huquqbuzarliklarni oldini olish borasida tizimli ish olib borilmoqda. Sodir etilayotgan har bir jinoyat mutasaddi idoralar rahbarlari ishtirokida mahallada keng muhokama qilinib, ularni oldini olish bo‘yicha zarur choralar ko‘rilyapti.

Mazkur uchrashuvlar davomida deputatlar tegishli tashkilot rahbarlari bilan birgalikda "Temir daftar", "Ayollar daftari", "Yoshlar daftari"lariga kiritilgan fuqarolarga yaratilayotgan shart-sharoitlar bilan ham tanishdilar.

Qonunchilik palatasi deputatlarining navbatdagi manzili Urganch shahar Xonqa ko‘chasida joylashgan "Beruniy Academy Khorezm" o‘quv markazi bo‘ldi.

Ishchi guruh a’zolari bu yerda markaz faoliyati bilan tanishib, o‘qituvchi va tinglovchilar bilan yaqindan muloqot qildilar. Ularga mamlakatimizda bu yil amalga oshirilgan konstitutsiyaviy islohotlar, uning mohiyati va ahamiyati haqida atroflicha ma’lumotlar berdilar.