Alisher Navoiy — soʻz mulkining sultoni

Surxondaryoda gʻazal mulkining sultoni Alisher Navoiyning 582 yilligi munosabati bilan partiyaning Shoʻrchi tuman Kengashi hamda tumandagi 65-umumiy oʻrta taʼlim maktabi hamkorlikda “Navoiy — nazm elining dahosi” mavzusida maʼnaviy-maʼrifiy tadbir tashkil etildi.
Yoshlarning buyuk mutafakkir Alisher Navoiy hayoti va ijodi haqidagi tasavvurlarini kengaytirish maqsadida tashkil etilgan mazkur gʻazalxonlik tadbirida partiya Shoʻrchi tuman Kengashi faollari, deputatlar, oʻqituvchi-pedagoglar, oʻquvchi yoshlar, ota-onalar, keng jamoatchilik vakillari qatnashdi.
Tadbirda soʻz olganlar shoirning oʻz xalqi va millati uchun fidoyi inson boʻlganligi, millat taraqqiyoti va jamiyat obodligi yoʻlidagi faoliyati biz uchun ibrat maktabi ekanligi toʻgʻrisida taʼkidlab oʻtishdi.

Shuningdek, tadbirda maʼruzachilar shoirning hayoti va ijodiy faoliyati toʻgʻrisida maʼlumot berib, Navoiy “Xamsa”sining oʻzbek adabiyotida tutgan oʻrni, buyuk bobomiz ilgari surgan gʻoyalar oʻzbek tili va adabiyoti, oʻzbek madaniyati, oʻzbek milliy mafkurasi, mustaqil oʻzbek davlatchiligi uchun asos boʻlib xizmat qilishi, shuningdek, yosh avlod qalbiga mutafakkir ijodini, boy merosini chuqur singdirish va targʻib qilish qanchalar ahamiyatli ekanligi toʻgʻrisida oʻz fikrlarini bildirdilar.
Shundan soʻng maktab oʻquvchilari tomonidan oʻzbek adabiy tilining asoschisi, buyuk mutafakkir Alisher Navoiyning hayoti va ijodi, bebaho asarlari haqida soʻz yuritildi. Oʻquvchilar shoir qalamiga mansub ruboiy, tuyuq va gʻazallarni, “Navoiy va Guli” monologini yoddan, ifodali oʻqib berishdi. Sermazmun sahna chiqishlarida Alisher Navoiyning “Xamsa” asaridan joy olgan dostonlar haqida qiziqarli maʼlumotlar berib oʻtildi.

Oʻrol Sherxanov, Xalq deputatlari Shoʻrchi tuman Kengashi deputati:
— Alisher Navoiy umrboqiy asarlari bilan butun dunyoni hayratga sola oldi, desak mubolagʻa boʻlmaydi. Jahonning turli mamlakatlarida Alisher Navoiy hazratlarining haykali oʻrnatilgani fikrimizning dalilidir. Navoiy asarlari shunday bir tuganmas xazinaki, uni qancha oʻqigan sayin inson oʻzini qiziqtirgan, oʻylantirgan savollariga javob topib boraveradi. Chunki Navoiyning har bir asari xalqqa qaratilganligi bilan ahamiyatlidir. Umid qilamiz, oilada Navoiy haqida farzandlarga bolalikdan tushuntirib borilsa, mumtoz adabiyotimiz namoyandasining asarlari haqida qiziqarli qilib bolaning qalbiga yetkaza olinsa, bu borada kelajakda muammo boʻlmaydi.
Tadbir davomida maktabning havaskor yoshlari tomonidan Navoiy gʻazallari asosida ijro etilgan kuy-qoʻshiqlar tadbir ishtirokchilari koʻnglida iliq taassurotlar uygʻotdi.
Tadbir soʻngida faol ishtirok etgan oʻquvchi-yoshlar esdalik sovgʻalari bilan taqdirlandilar.

Jumaniyoz Safarov,
Oʻzbekiston “Adolat” SDP
Shoʻrchi tuman “Yosh adolatchilar qanoti” Kengashi faoli