Amir Temur – adolat timsoli

Maʼlumki, xalqimizning havas qilsa arzigulik tarixi, madaniyati va maʼnaviy merosi hamda buyuk ajdodlari bor. Bu boyliklarimiz ichida bebaho gavharimiz esa, bu hech shubhasiz, Sohibqiron Amir Temur hazratlaridir. Chunki u kishi nafaqat ulugʻ sarkarda, balki ilm-maʼrifat homiysi, namoyondasi, bir soʻz bilan aytganda ibratli va beqiyos hayot maktabi hamdir. Binobarin, biz bundan qancha faxrlansak, oʻzimizga ibrat olsak arziydi. Eng muhimi Amir Temur shaxsini yanada mukammal va chuqurroq bilishimiz, uning hayot yoʻlini yoshlarga namuna sifatida oʻrgatishimiz kerak.

Darhaqiqat, Buyuk Temur Renessans davrining asoschisi ekanligi ham barchamizga maʼlum. Muhtaram prezidentimiz taʼbiriga koʻra, “Oʻn beshinchi asrda Sohibqiron Amir Temur bobomiz asos solgan va uning avlodlari davom ettirgan muhtasham saltanat yurtimizda ikkinchi Uygʻonish, yaʼni ikkinchi Renessansni boshlab berdi”

Bugun buyuk sarkarda, davlat arbobi Amir Temurning vatanparvarligini chuqur oʻrganish har doimgidan ham dolzarb vazifadir. Shavkatli ajdodimiz murakkab tarixiy sharoitda Xalqning boshini qovushtirdi, istilochilarga qaqshatqich zarba berib, istiqlol bayrogʻini baland koʻtardi. Parokanda mamlakatlar va elatlarni birlashtirib, markazlashgan qudratli davlat tuzdi. Buyuk Temur xalq yoʻlboshchisi, yalovbardori, istiqlolchi, daho hamda vatanparvar timsolida namoyon boʻldi. Uning milliy tariximizda tutgan oʻrni va xizmatlari bebahodir.

Yurtimizda har yili buyuk sarkarda, Sohibqiron Amir Temur tavallud topgan kun keng nishonlanib kelinmoqda. Anʼanaga muvofiq bu yil ham ulugʻ bobokalonimizning tavallud ayyomining 687-yilligi arafasida barcha hududlarda turli uchrashuv va tadbirlar boʻlib oʻtmoqda.

Xususan, mazkur sana munosabati bilan partiyaning Jizzax viloyat Kengashi tashabbuskorligida Sh.Rashidov tumani xalq taʼlimi boʻlimiga qarashli 4-sonli umumtaʼlim maktabi bilan hamkorlikda “Amir Temur — adolat timsoli” mavzusida maʼnaviy-maʼrifiy tadbir tashkil etildi.

Tadbirni ochib berish uchun soʻzga chiqqan partiyaning viloyat Kengashi bosh mutaxassisi Shahnoza Soatova barchani ulugʻ bobokalonimiz, buyuk sarkarda, sohibqiron Amir Temur tavalludining 687-yilligi munosabati bilan tabriklab, yoshlarni barkamol avlod boʻlib voyaga yetishlarida bor kuch va imkoniyatlardan samarali foydalanish, har tomonlama sogʻlom va barkamol yoshlarni tarbiyalash, yoshlarga oid davlat siyosatining ustuvor yoʻnalishlari, bu borada partiya tomonidan amalga oshirilayotgan tashabbuslar xususida toʻxtalib oʻtdi.

Tadbir davomida maktab oʻquvchilari tomonidan tashkil etilgan turli xil badiiy chiqishlar, sahna koʻrinishlari ishtirokchilarga birdek manzur boʻldi. Tadbir soʻngida oʻquvchilar guruhlarga boʻlinishib, Sohibqiron Amir Temurning hayoti va faoliyatiga oid savollar-javoblar orqali oʻzaro bellashishdi. Savol-javoblardan yoshlarimizning buyuk sarkarda haqida koʻplab bilimlarga ega ekanliklari yaqqol bilinib turdi. Gʻolib jamoaga partiyaning faxriy yorliq hamda esdalik sovgʻalari topshirildi.

“Adolat” SDP Jizzax viloyat Kengashi
matbuot xizmati