Aniq maqsad, vazifalar insonlar hayotiga yangicha mazmun baxsh etdi

Bugungi mamlakatimiz jahon sahnasida oʻz mustaqil taraqqiyot yoʻliga ega mamlakat sifatida yetakchilar safida ildamlab bormoqda. Albatta, bu yetakchilik asosida mamlakatning oʻz oldiga belgilab olgan qatʼiy maqsadi, rivojlanish prinsiplari va ularni amalga oshirishdagi jonbozligi muhim oʻrin tutadi. Bunda mamlakat taraqqiyotining asosiy omillaridan biri – ijtimoiy himoyaga alohida eʼtibor qaratilayotgani zarur jihatlardan hisoblanmoqda. Zero, kuchli ijtimoiy himoyalangan mamlakatgina koʻzlangan maqsadga erishishi shubhasizdir.

Bu borada “Oʻzbekiston — 2030” strategiyasini tasdiqlash va uni 2023-yilda amalga oshirish chora-tadbirlari boʻyicha qabul qilingin Oʻzbekiston Respublikasi Prezidentining farmoni va qarorida ilgari surilayotgan hayotbaxsh gʻoyalarni bugungi siyosatimizning ustuvor yoʻnalishiga aylantirishida ham aynan shu mazmun-mohiyat mujassam. Mazkur hujjatlarda aksini topgan oqilona, insonparvar siyosat, inson huquq va manfaatlarining soʻzsiz ijrosi yoʻlidagi dadil qadamlar, yaqin kelajakda amalga oshiriladigan keng koʻlamli islohotlar, aniq maqsad va vazifalar insonlar hayotiga yangicha mazmun baxsh etishi shubhasiz. Tan olib aytish kerakki, inson manfaatlari ustuvorligi taʼminlash, jamiyatni yanada rivojlantirish maqsadida aholining takliflari, talab va ehtiyojlarini eʼtiborga olgan holda qabul qilingan ushbu hujjat odamlar qalbida yashash va ishlashga, ertangi farovon kelajakka boʻlgan qarashlarni oʻzgartirib yubordi.

Birgina misol, onkogematologik kasalliklarga chalingan bolalar uchun alohida markaz, gemotopoetik suyak koʻmigi oʻzak hujayralari transplantatsiyasi amaliyoti joriy etilishi, virusli gepatitning “S” turi bilan kasallangan bemorlarni hamda gemotopoetik suyak koʻmigi oʻzak hujayralari transplantatsiyasi muolajasiga muhtoj onkologik kasalliklarga chalingan bolalarni toʻliq Davlat byudjeti mablagʻlari hisobidan davolashni yoʻlga qoʻyish borasida belgilangan vazifalarning oʻziyoq har bir inson eʼtiborda, qadri har narsadan ulugʻ ekanligining yana bir namunasi desam yanglishmayman.

Yodimda, murgʻak vujudi xastalik bilan mardonavor kurashayotgan jajji bolajonlarga ozgina boʻlsa-da quvonch ulashish, ularning dillariga xushnudlik baxsh etish istagida Respublika ixtisoslashtirilgan onkologiya va radiologiya ilmiy — amaliy tibbiyot markazi Samarqand viloyat filialida davolanayotgan bemor bolajonlar holidan xabar olish maqsadida filialga kirib borganimizda, bolajonlar bilan ularning olam-olam orzulari haqida suhbat qurdik. Farzandiga kuz yoshini sezdirmasdan ichidan ezilib yigʻlagan otalarni, kuz yoshi yuzini yuvayotgan onalarni koʻrib ollohdan ularning dardiga shifo soʻradik. Aynan ushbu hujjatda meni quvontirgan holat gemotopoetik suyak koʻmigi oʻzak hujayralari transplantatsiyasi muolajasiga muhtoj onkologik kasalliklarga chalingan bolalarni toʻliq Davlat byudjeti mablagʻlari hisobidan davolashni yoʻlga qoʻyilishini qonun hujjatlari orqali mustahkamlab quyilgani boʻldi.

Endi viloyatimizdagi ushbu filialda davolanayotgan ayni paytda shunday muolajaga muhtoj boʻlgan 8 nafar bolalarga ham davlat tomonidan toʻliq muolajalarni oladi. Bu imtiyozlar bemor farzandini yuziga termilib oʻzi ham yeb-ichishini unutgan ota-onalar uchun, kam taʼminlangan, boquvchisini yoʻqotgan, nogironlar uchun katta ahamiyat kasb etadi. Bu yaratilayotgan imtiyozlar zamirida davlatimizning oʻz fuqarolariga gʻamxoʻrligi, qoʻllab-quvvatlashlari birlamchi mezon boʻlib xizmat qilmoqda. Rivojlanish marralari sari dadil qadam tashlayotgan Vatanimiz istiqboli uchun bu omillar naqadar zarur ekanligini his etamiz.

Shu oʻrinda qayd etish joizki, Oʻzbekiston “Adolat” sotsial-demokratik partiyasining saylovoldi dasturida birinchi galda ijtimoiy manfaatlar ustuvor yoʻnalish sifatida belgilab olingan. Biz mamlakatda kuchli ijtimoiy siyosat olib borilishi tarafdori boʻlib, ijtimoiy yoʻnalishdagi gʻoya va tashabbuslarni qoʻllab-quvvatlaymiz. Xalqning, odamlarning hayotdan rozi boʻlib yashashlari uchun harakatdamiz. Demakki, xalq farovonligi, yurt taraqqiyoti yoʻlida amalga oshirilishi zarur boʻlgan maqsadlarni aniq yechimi va maqbul usullarini oʻzida jamlagan ushbu hujjatning hayotga joriy etilishida, ijrosini taʼminlash yoʻlida islohotlarga kamarbasta boʻlib siyosiy qatʼiyat, hozirjavoblik va birdamlik bilan harakat qilamiz.

Muhiba Bababekova,

“Adolat” SDP Samarqand viloyat Kengashi raisi,

Xalq deputatlari Samarqand shahar Kengashi deputati.