Ayol jamiyat gultoji, hayot davomchisi

Millat kelajagi, hayot davomchisi moʻtabar ayoldir. Har qanday xalqning maʼnaviy yuksakligini millat ayollarining maʼnaviy saviyasi belgilaydi. Shu jihatdan keyingi yillarda mamlakatimizda xotin-qizlarning huquq va manfaatlarini, oila, onalik va bolalikni himoya qilish, ular uchun yangi ish oʻrinlari yaratish, mehnat va turmush sharoitlarini yaxshilash davlat siyosatining ustuvor yoʻnalishiga aylandi. Davlatimiz rahbari tomonidan xotin-qizlarning ijtimoiy-siyosiy faolligini oshirish, bandligini taʼminlash, haq-huquqlarini himoya qilish borasida keng qamrovli ishlar olib borilyapti.

Bugun Oʻzbekiston Respublikasi Prezidenti huzuridagi Davlat boshqaruv akademiyasi Qarshi filialida “Adolat” SDP Qashqadaryo viloyat Kengashi, “Olima ayollar” Qashqadaryo viloyat Kengashi va Oʻzbekiston Respublikasi Prezidenti huzuridagi Davlat boshqaruv akademiyasi Qarshi filiali bilan hamkorlikda “Yangi Oʻzbekiston taraqqiyotida xotin-qizlarning boshqaruv sohasidagi faoliyatini takomillashtirish usullari” mavzusida Respublika masofaviy, ilmiy-amaliy konferensiyasi boʻlib oʻtdi. Tadbirda Oʻzbekiston Respublikasi Prezidenti huzuridagi Davlat boshqaruv akademiyasi respublika va viloyatlar xodimlari, “Adolat” SDPning respublika va viloyat xodimlari, Qashqadaryo viloyat xotin qizlar boshqarmasi rahbari, viloyatning olima va rahbar ayollari oʻz maʼruzalari bilan ishtirok etdilar.

Partiyaning faol ayollari ham bugungi kunda olib borilayotgan oʻzgarishlar, chiqarilayotgan qonunlar, 30-aprelda boʻlib oʻtadigan Referendum toʻgʻrisida ham toʻxtalib oʻtdilar.

Bugun yurtimizda xotin-qizlar va erkaklarning huquq va imkoniyatlari tengligini taʼminlash davlat siyosatining ustuvor yoʻnalishi etib belgilandi. Xususan, ayollarning gender tengligini taʼminlash borasida amaldagi qonun hujjatlari mustahkamlandi. Xotin-qizlarning huquq va erkinliklari, qonuniy manfaatlarini mustahkamlash, davlat boshqaruvidagi, jamiyat va davlat hayotidagi rolini kuchaytirishga alohida eʼtibor qaratilmoqda.

Yurtimizda bugungi kunda ayol rahbarlar – vazirlar, hokimlar, ishlab chiqarish birlashmalari, bank va kompaniyalar raislari, huquq-tartibot idoralarida masʼul vazifalarda xizmat qilayotgan opa-singillarimiz soni ortib bormoqda.

Oʻzbekiston Respublikasi insonparvar huquqiy demokratik davlat va fuqarolik jamiyati qurish yoʻlidan dadil bormoqda. Ushbu olijanob, ammo, murakkab vazifani amalga oshirish Respublikamizda yashovchi har bir kishidan ijtimoiy faol boʻlishni, erkin va farovon hayot, ozod va obod Vatan barpo etish uchun fidoyilik koʻrsatib yashash va mehnat qilishni talab etadi. Milliy demokratik taraqqiyot kun tartibiga qoʻyayotgan mazkur talab xotin-qizlarga ham bevosita taalluqlidir. Bugun maʼrifiy dunyoda -xotin-qizlar manfaati degan alohida masala bor va uni oʻrganish, yechimini topishga juda katta ahamiyat berilishi bejizga emas albatta. Agar ayollarga yetarli eʼtibor berilmasa, bunday jamiyatning kelajagi boʻlmasligini barchamiz aniq tushunib yetamiz, har qanday mamlakat oʻz rivojlanish strategiyasi yaʼni uzoq muddatli davlat dasturlari orqali iqtisodiy, ijtimoiy va siyosiy tizimlarni birga olib boradi.

Respublikada xotin-qizlarning ahvolini yaxshilash, ularning erkinligi, huquqi, manfaatlari va sogʻligʻini muhofaza qilish mamlakat siyosatining ustuvor yoʻnalishlari qatoridan joy olgan. “Zero, umummilliy siyosatning maʼnosi xotin-qizlarni ijtimoiy jihatdan qoʻllab-quvvatlashga qaratilgan davlat siyosatini umumjamiyat ishiga aylantirish demakdir”.

Tadbir barcha ishtirokchilarga yaxshi taassurot qoldirdi.

Dilafro‘z To‘ychiyeva,

 O‘zbekiston “Adolat” SDP Qashqadaryo viloyat

ayollar Kengashi faoli.