Ayollar huquqiy madaniyatini takomillashtirish qay ahvolda?

“Adolat” SDP Nishon tumani Kengashi tomonidan tuman hokimligi tadbirgohida xotin-qizlarning Yangi Oʻzbekiston ijtimoiy-siyosiy hayotidagi roli va faolligini oshirish, ayollarning hokimiyat hamda boshqaruv sohalarida salohiyatini toʻla namoyon etishi uchun zarur sharoitlarni yaratish maqsadida “Xotin-qizlar huquqlari va gender tenglik” mavzusida tadbir tashkil etildi. Unda partiya faollari, xotin-qizlar tashkilotlari aʼzolari, yoshlar va keng jamoatchilik vakillari hamda ommaviy axborot vositalari xodimlari qatnashdi.

Tadbirda ayollar Kengashi faoli, huquqshunos Dilrabo Choriyeva soʻzga chiqdi.

-Bugun xotin-qizlar huquqiy madaniyatini yanada takomillashtirish dolzarb masala hisoblanadi,- dedi Dilrabo Choriyeva.- Bu haqda davlatimiz rahbari BMT ning 78-sessiyasida ham alohida eʼtirof etgan edilar. Darhaqiqat, xotin-qizlarni qoʻllab-quvvatlashga doir davlat siyosatining samarali amalga oshirilishini taʼminlash, ularning huquqlari va qonuniy manfaatlarini himoya qilishning ahvoli ayrim hududlarda talab darajasida emas.

-Shuni bilib olish kerakki, gender bu – xotin-qizlar va erkaklar oʻrtasidagi oʻzaro munosabatlarning jamiyat hayoti va faoliyatining hamma sohalarida, shuningdek, siyosiy faoliyat, iqtisodiyot, huquq, mafkura va madaniyat, taʼlim hamda ilm-fan sohalarida namoyon boʻladigan ijtimoiy jihat hisoblanadi,-dedi xalq deputatlari Qashqadaryo viloyat Kengashi deputati Dilrabo Temirova.-Jumladan, viloyatimizda ham xotin-qizlarning huquq va qonuniy manfaatlarini himoya qilish, ularning barcha jabhada iqtisodiy, ijtimoiy va siyosiy faolligini oshirish, sogʻliklarini tiklab olishlari, kasb-hunarli boʻlishlari, bandligini taʼminlash, tadbirkorlikka keng jalb etish, ayniqsa ehtiyojmand xotin-qizlarni ijtimoiy qoʻllab-quvvatlash, gender tenglikni taʼminlash borasida olib borilayotgan islohotlar tizimli davom ettirilmoqda. Xususan, “Xotin-qizlar va erkaklar uchun teng huquq hamda imkoniyatlar kafolatlari toʻgʻrisida”gi hamda “Xotin-qizlarni tazyiq va zoʻravonlikdan himoya qilish toʻgʻrisida”gi Oʻzbekiston Respublikasining Qonunlari qabul qilingandan soʻng birmuncha ishlar amalga oshirildi. Xotin-qizlarning huquqiy madaniyati kun sayin takomillashib boryapti.

Darvoqe, gender zoʻravonlik – bu dunyo hamjamiyatini oʻylantirib kelayotgan muammo boʻlib, jamiyatda bunday zoʻravonlikka hech qanday holatda ham koʻz yumib turmasdan, taʼlim va ommaviy axborot vositalari, keng jamoatchilik orqali har qanday koʻrinishdagi zoʻravonlikni inkor etadigan, unga toqat qila olmaydigan muhit yaratishda hissa qoʻshishimiz zarur . Buning uchun nafaqat huquqshunoslar, hokimiyat boshqaruv idoralari, balki mahalla faollari ham masʼuliyatni unutmasliklari lozim. Tadbirda partiya faollari shu singari targʻibot tashviqot uchrashuvlari orqali ayollarning huquqiy madaniyatini muntazam oshirib borish ham gender tenglikni taʼminlashda ahamiyati beqiyos ekanligini alohida taʼkidladilar.

Dilafroʻz Yavqochdiyeva,

Partiya faoli