“Ayollar zoʻravonligiga qarshi birga kurashamiz”

“Adolat” SDP Gʻuzor tuman Kengashi hamda tuman xotin-qizlar qoʻmitasi va hamkor tashkilotlar tomonidan “Bir adolatchi – yuz ayolga himoyachi” loyihasi doirasida “Ayollarni zoʻravonlikdan himoyalaymiz” shiori ostida tadbir boʻlib oʻtdi. Xoʻjagʻuzor mahallasi tadbirgohida tashkil etilgan tadbirda xotin-qizlar, yoshlar, huquq tartibot idoralari vakillari ishtirok etishdi.

Qizgʻin savol-javoblar asosida boʻlib oʻtgan tadbirda partiya faoli, huquqshunos Dilrabo Choriyeva maʼruza qildi.

-Partiyamizning “Bir adolatchi – yuz ayolga himoyachi” loyihasi doirasida keng qamrovli ishlar olib borilyapti,-dedi Dilrabo Choriyeva.- Partiya tashkilotlari masʼullari tomonidan xotin-qizlar bandligini taʼminlashga alohida eʼtibor qaratilmoqda. Hozirgacha 250 nafardan ziyod ishsiz ayollarimiz ijtimoiy foydali mehnatga jalb etildi. Qariyb 5 ming nafardan ziyod xotin-qizlarimiz oʻrtasida “Ayollarni zoʻravonlikdan asraymiz” mavzusida tushuntirishlar olib borildi. 80 ga yaqin notinch oilalardagi kelishmovchiliklar borasidagi muammolar partiyamiz faollari, huquq tartibot idoralari va diniy tashkilotlar hamkorligida bartaraf etildi.

Shuningdek tadbirda xalq deputatlari Gʻuzor tumani Kengashi deputati Erkin Pardayev, partiya faollari Feruza Roʻziyeva, Lola Usmonovalar ham soʻzga chiqib, Gender zoʻravonlik geografik, ijtimoiy yoki iqtisodiy chegara bilmas muammolardan biri ekanligini alohida taʼkidlashdi. Mamlakatimizda Prezidentimiz boshchiligida ayollarga nisbatan zoʻravonlikka barham berish masalasiga jiddiy eʼtibor berilmoqda. Shuni alohida taʼkidlash kerakki, ayollarga nisbatan zoʻravonlikning oldini olish, zoʻravonlik qurbonlarini reabilitatsiya qilish boʻyicha qator aniq chora-tadbirlar belgilanib, ijrosi taʼminlanyapti. Hozirgacha 8 ta normativ-huquqiy hujjat qabul qilingan boʻlsa, shundan 2 tasi qonunlardir.

Tadbirda Oʻzbekiston “Adolat” SDP Qashqadaryo viloyat Kengashi faollari ham xotin-qizlarni har tomonlama qoʻllab-quvvatlash, ularni qiynab kelayotgan mavjud muammolarni bartaraf etish, faolligini oshirishda jonbozlik koʻrsatayotgani taʼkidlandi. Jumladan, partiya tuman Kengashi “Ayollar qanoti” faollari tuman hududidagi har bir mahallaga kirib borgani, u yerda ayollar bilan individual, tizimli ishlar olib borishayotgani eʼtirof etildi.

        Bahrom Mustafoyev,

“Adolat” SDP Gʻuzor tuman Kengashi raisi.