Ayollardan rahbar kadrlarni tayyorlash va ularni jamiyatning faol qatlamiga aylantirishda nimalar toʻsqinlik qilmoqda?

Davlat boshqaruvi va huquqni muhofaza qiluvchi idoralar tizimida ayollar soni kam. Xotin-qizlardan rahbar kadrlarni tayyorlash, ularni jamiyatning eng faol qatlamiga aylantirish bugungi kunning muhim vazifasi hisoblanadi. Keyingi vaqtlarda Prezidentimiz boshchiligida Oʻzbekiston Xotin-qizlar qoʻmitasining vazifalari qayta koʻrib chiqildi. Ayollarning ijtimoiy siyosiy faolligini oshirish uchun davlat tomonidan barcha shart-sharoitlar yaratib berilyapti.

“Adolat” SDP Shahrisabz shahar Kengashi tomonidan Shahrisabz MFY tadbirgohida xotin-qizlarning mamlakat ijtimoiy-siyosiy hayotidagi faolligini oshirish, ularning hokimiyat boshqaruv idoralarida salohiyatini toʻla namoyon etishi uchun “Xotin-qizlar huquqlari va gender tenglik” mavzusida tashkil etilgan tadbirda ham shular xususida soʻz yuritildi.

Tadbirda xalq deputatlari Qashqadaryo viloyat Kengashi deputati Dilrabo Temirova maʼruza qildi.

 -Ayollarning mamlakatimiz ijtimoiy siyosiy hayotidagi rolini oshirish, tashabbuslarini qoʻllab-quvvatlash davlat siyosatining ustuvor vazifalaridan biridir,-dedi Dilrabo Temirova.-Shahrimizda ham xotin-qizlarimizning mehnat jamoalarida va boshqaruv sohasidagi rolini kuchaytirish, ularga huquqiy jihatdan koʻmak koʻrsatish borasida maqsadli ishlar olib borilyapti. Partiyaning shahar Kengashi va BPTlar faollari hamda masʼul tashkilotlar hamkorligida oʻtgan ikki oy davomida 50 nafarga yaqin ayollarga homiylarni jalb etgan holda yordam koʻrsatildi. Ogʻir ijtimoiy ahvolga tushib qolgan va nogironligi boʻlgan opa-singillarimizning manzilli roʻyxati shakllantirilib, reabilitatsiya vositalari ajratildi.

Shuningdek, tadbirda unib-oʻsib kelayotgan yosh qizlarni oilaviy hayotga tayyorlash, ularga oiladagi nizoli holatlarni hal qilishning huquqiy va psixologik asoslarini oʻrgatish, oilalarni mustahkamlash, erta nikoh va oilaviy ajralishlarning oldini olish boʻyicha ham fikr mulohaza yuritildi. Ishtirokchilardan tushgan xotin-qizlar huquqlari va gender tenglik masalasidagi koʻpdan-koʻp savollarga mutasaddilar mufassal javob qaytarishdi.                                                

 Samariddin Zayniddinov,

                      “Adolat” SDP Shaxrisabz shahar Kengashi raisi.