Ayollarni zoʻravonlikdan himoyalash tizimi takomillashtirilmoqda

“Adolat” SDP Yakkabogʻ tuman Kengashi va xotin-qizlar qoʻmitasi hamkorligida partiyaning “Bir adolatchi – yuz ayolga himoyachi” loyihasi doirasida “Ayollarni zoʻravonlikdan himoyalaymiz” shiori ostida tadbir boʻlib oʻtdi. Unda partiya faollari deputatlar, tuman hokimligi tasarrufidagi korxona tashkilotlar va muassasalarda faoliyat olib borayotgan xotin-qizlar, 30 dan ziyod mahallalar aʼzolari qatnashdi. Isat MFY da boʻlib oʻtgan tadbirda ayollar Kengashi faoli Gulnoza Radjabova maʼruza qildi.

-Yangi Oʻzbekistonda Prezidentimiz boshchiligida xotin-qizlar uchun keng imkoniyatlar yaratilyapti,-dedi Gulnoza Radjabova.- Ayniqsa ularni jamiyat hayotidagi faolligini oshirish, bandligini taʼminlash, haq-huquqlarini muhofaza qilishga alohida eʼtibor berilyapti. Birgina “Adolat” SDP tashkilotlari tomonidan oʻtgan oyda 90 dan ortiq xonadonlarda boʻlib 30 dan ortiq ayollar ijtimoiy foydali mehnatga jalb etildi. 6 ta kelishmovchiliklar yuzaga kelgan oilalardagi muammolarga deputatlar va masʼul idoralar hamkorligida yechim topildi.

-Xotin-qizlar huquqlari haqida gap ketganda, eng avvalo   bu huquqni taʼminlash dolzarbligini tushuntirib borish ham muhim ahamiyatga ega,-dedi xalq deputatlari tuman Kengashi deputati   Dilbar Musayeva .- Toʻgʻri keyingi yillarda ichki ishlar organlariga xotin-qizlarga nisbatan tazyiq va zoʻravonlik holatlari yuzasidan kelib tushayotgan murojaatlar birmuncha kamaygan. Biroq zoʻravonlikka uchragan ayollarning juda kam qismi tegishli joyga murojaat qilishi, ularning aksariyati qoʻrquv va boshqa sabablar bilan tazyiqlarga toqat qilishga majbur ekanini ham unutmasligimiz kerak. Raqamlarga murojaat qiladigan boʻlsak, ayollarga nisbatan zoʻravonliklarning asosiy koʻpchiligi oilada sodir etilgan. Shuning uchun ham mahallalarda xotin-qizlar zoʻravonligiga qarshi oilalarda keng qamrovli tushuntirish ishlarini olib boryapmiz. Qabul qilinayotgan qonunlar, davlatimiz rahbari tomonidan imzolanayotgan farmon va qarorlar mazmun mohiyati aholiga toʻgʻri tushuntirilyapti. Shuning uchun ham tumanimizda xotin-qizlarga nisbatan tazyiq va zoʻravonliklar kamaymoqda.

Tadbirda ayollarga nisbatan zoʻravonliklar asosan sifatsiz taʼlim sabab boʻlgan past iqtisodiy koʻrsatkichli oilalar boshiga toʻgʻri kelayotgani, ayollarga nisbatan zoʻravonliklar ayolning iqtisodiy yetishmovchiligi tufayli yuz berishi, dunyodagi davlatlarning kam qismi ayollarni tazyiq va zoʻravonlikdan himoya qilish borasidagi qonunlarni qabul qilganligi aytib oʻtildi. Yuzma-yuz muloqot shaklida boʻlib oʻtgan tadbirda Oʻzbekiston “Ayollarni tazyiq va zoʻravonlikdan himoya qilish toʻgʻrisida”gi va “Ayollar va erkaklar uchun teng huquq va imkoniyatlar kafolatlari toʻgʻrisida”gi qonunlarni qabul qilgan sanoqli davlatlar qatoriga kirishi aytib oʻtildi. Albatta bu qonunlar davlat va boshqa tegishli tashkilotlarni ayollar zoʻravonligiga qarshi kurashish va ularga barham berishga chaqiradi.

Tadbir davomida ana shular xususida soʻz yuritilib, xotin-qizlarga nisbatan zoʻravonlik va reproduktiv yoshidagi ayollar oʻlimi va ularning mehnatga layoqatsiz boʻlib qolishining muhim sabablari koʻrsatib berildi.

Ural Umarov,

Partiya faoli.