Bagʻrikenglik - oʻzbek xalqiga xos azaliy qadriyat

Bagʻrikenglik oʻzbek xalqiga xos boʻlgan chinakam insoniy fazilatdir. Bagʻrikenglik oʻzbek xalqi maʼnaviyati va madaniyatining ajralmas qismi hisoblanadi. U samimiyat, ochiq muloqot hamda vijdon va eʼtiqod tufayli vujudga keladi. Yurtimizda nafaqat ijtimoiy-iqtisodiy, siyosiy sohalar, balki zaminimizda istiqomat qilib kelayotgan turli millat va elatlar oʻrtasida doʻstlik rishtalarini yanada mustahkamlash, diniy bagʻrikenglik tamoyillarini qaror toptirishga ham alohida eʼtibor qaratib kelinadi. Shuningdek, u faqat maʼnaviy burchgina emas, balki siyosiy va huquqiy ehtiyoj hamdir.

Tarixan bir mayizni qirq boʻlib yegan xalqmiz. Bagʻrikenglik, insonparvarlik qon-qonimizga singib ketgan. Xususan ikkinchi jahon urushi yillarida Oʻzbekistonga bir millionga yaqin kishilar panoh istab kelgan. Ularning 200 mingdan ziyodi hali es-hushini tanib ulgurmagan bolalar edi. Ana shunday murakkab hamda ogʻir sharoitda Yuzlab oʻzbek oilalari ukrainalik, belaruslik hamda rossiyalik turli millatga mansub bolalarni oʻz bolasiday suyib alqadi. Mehr berdi, boshpana, oziq-ovqat, kiyim-kechak bilan taʼminladi. Otalik, onalik muhabbatini darigʻ tutmadi. Buni taʼriflashga til ojiz.

Urush davri voqea-hodisalarini tarix sahifalariga muhrlash, xalq ruhini koʻtaruvchi asarlar yaratish maqsadida olim-u ulamolar, shoir-u yozuvchilarning aksariyati front ortida oʻz faoliyatlarini davom ettirishardi. Ana shulardan bir guruhi Toshkentda yashab, ijod qilishgan. Ular orasida dunyoga mashhur rus shoirasi Anna Axmatova ham bor edi. Uning qaydlarida har qanday yurakni titroqqa solish qudratiga ega quyidagi samimiy dil soʻzlari uchraydi: “Milliy qadriyatgina odamlarni buyuk doʻstlik sari chorlab, qalb va tafakkurga sadoqat va jasorat tuygʻusini hadya etadi, odamiylikni ulugʻlashga imkon yaratadi. Insonparvarlikning yuksak darajasi Shoahmad va Bahri ayalarning hayotida namoyon edi. Dunyo ostin-ustun boʻlayotgan bir pallada shu qadar mehrga zor norasidalarni yaxshi insonlar qilib yetishtira olgan bu ikki zotni eng ulugʻ Ota va eng ulugʻ Ona degimiz kelmaydimi?!”

Darhaqiqat, Shomahmudovlar bagʻrikenglikning yuksak namunasini koʻrsatgan oila sifatida tarixda qoldi. Toshkentlik temirchi Shoahmad ota va uning rafiqasi Bahri aya rus, ukrain, tatar, moldavan, chuvash, yahudiy, qozoq millatiga mansub 14 oʻgʻil-qizni koʻz qarogʻida avaylab ulgʻaytirishdi.

Muhtaram Prezidentimiz Shavkat Mirziyoyev Ikkinchi jahon urushi yillarida yuksak mehr-muruvvat va oqibat koʻrsatgan ana shu oilaning jasoratini alohida qayd etib oʻtar ekan, “Yer yuzida juda kamdan-kam davlat va millat bunday yuksak insoniy fazilatlar bilan gʻururlanishi mumkin. Vaqt oʻtgan sari Shomahmudovlar oilasi koʻrsatgan bu qahramonlikning ahamiyati va qadri tobora oshib bormoqda”, — deya alohida taʼkidladi.

Bugungi siyosiy barqarorlik va millatlararo totuvlikni taʼminlashda, fuqarolarimizda yagona Vatan tuygʻusini shakllantirishda, yurt istiqboliga daxldorlik hissini kamol toptirishda xalqimizning ana shu bagʻrikenglik xislati asosiy omil boʻlib xizmat qilmoqda.

Bugungi kunda ham mamlakatimizda istiqomat qilib kelayotgan 130 dan ortiq millatlar oʻrtasida totuvlik va bagʻrikenglikni taʼminlash, doʻstlik muhitini va koʻp millatli katta yagona oila tuygʻusini mustahkamlash, xorijiy mamlakatlar bilan madaniy-maʼrifiy aloqalarni kengaytirishga yoʻnaltirilgan keng miqyosdagi ishlar amalga oshirildi.

Bu, ayni paytda Oʻzbekistonning barcha sohadagi islohotlarida ham oʻz aksini topgan. Jumladan, 2022-2026 yillarga moʻljallangan Yangi Oʻzbekistonning Taraqqiyot strategiyasida millatlararo totuvlik va diniy bagʻrikenglikni taʼminlash, yon-atrofimizda xavfsizlik, barqarorlik va ahil qoʻshnichilik muhitini rivojlantirish, yurtimizning xalqaro nufuzini mustahkamlash masalalariga alohida eʼtibor qaratilgan.

Xususan, Taraqqiyot strategiyasining 74-maqsadi Jamiyatda millatlararo totuvlik va dinlararo bagʻrikenglik muhitini mustahkamlash masalasiga bagʻishlangani mamlakat Prezidenti va hukumatining turli millat va elatlar, diniy konfessiyalar vakillari oʻrtasidagi ahil-inoqlik, hamjihatlikni taʼminlash borasida amalga oshirilayotgan ishlarga, tinchlik-osoyishtalik, barqarorlikni saqlash yoʻlida olib borilayotgan oqilona islohotlarga, qolaversa, xalqaro hujjatlarda belgilangan umuminsoniy vazifalarga qaratayotgan yuksak eʼtiborining namunasi hamdir.

Yaxshi bilamizki, Vatanimiz qitʼalararo madaniy-tijoriy aloqalarni yaxshilashga xizmat qilgan Buyuk Ipak yoʻlining qoq markazida joylashgan. Bu yerda turli xalqlarning milliy anʼana va urf-odatlari oʻzaro uygʻunlikda rivojlangan. Demak, oʻzbekona bagʻrikengligimizning ildizlari juda qadim zamonlarga borib taqaladi va bu borada biz hamisha jahon ahliga namuna boʻlib kelganmiz.

Mamlakatimizning barqaror surʼatlar bilan rivojlanishi, ijtimoiy-siyosiy, iqtisodiy va maʼnaviy sohalardagi islohotlarning muvaffaqiyatli amalga oshirilishi, xalqaro hamjamiyatda mamlakatimiz nufuzining oshishi, fuqarolarning irqi, millati, tili, eʼtiqodi, shaxsi va ijtimoiy kelib chiqishidan qatʼiy nazar, qonun oldida tengligini taʼminlash hamda turli millat va elatlar vakillarining tili, urf-odatlari va anʼanalarini hurmat qilish, ularni rivojlantirish uchun zarur shart-sharoitlar yaratish bilan chambarchas bogʻliq.

Shoira AKBAROVA,
Xalq deputatlari Sharof Rashidov tuman Kengashi deputati