Barcha saʼy-harakatlar inson qadrini yuksaltirishga qaratilgan

Partiyaning Sherobod tuman Kengashi tomonidan tuman Axborot kutubxona markazida “Konstitutsiyaviy islohotlar mazmun-mohiyati” mavzusida targʻibot tadbiri boʻlib oʻtdi. Tadbirga partiya faollari, deputatlar hamda Termiz Davlat universiteti oʻqituvchilari va kutubxona xodimlari ishtirok etishdi.

Tadbirda soʻzga chiqqanlar referendumni oʻtkazish tartib-qoidalarini tushuntirish bilan birga Konstitutsiyaviy qonun loyihasida oʻz ifodasini topgan yangi modda va normalar xususida maʼlumotlar berib oʻtdi.

Taʼkidlanganidek, yangilanayotgan Konstitutsiyamiz ilgari amal qilib kelgan “davlat – jamiyat – inson” tamoyilini “inson – jamiyat – davlat” deb oʻzgartirish, yaʼni eng avvalo inson manfaatini har narsadan ustun qoʻyishni nazarda tutadi.

Yangilanayotgan Bosh Qomusimiz fuqarolarning huquqlari, erkinliklari va qonuniy manfaatlari toʻlaqonli taʼminlanishiga xizmat qilishi bilan ahamiyatlidir.

Qarshi Allanazarov, partiya faoli:

— Bosh qomusimizga kiritiladigan jamiki oʻzgarishlarning negizida ham Oʻzbekistonda kechayotgan islohotlar mohiyatini belgilovchi “Inson qadri uchun” ulugʻvor gʻoyasi yotadi. Konstitutsiyaviy oʻzgarishlarning asl mohiyati ham shu aslida. Chunki xalqimiz hozirgi tarixiy islohotlarning mazmun-mohiyatini toʻla anglab yetmoqda.

Xalq fikrini oʻrganish asosida mamlakat konstitutsiyasini takomillashtirish yurtimizda amalga oshirilayotgan islohotlarni yangi sifat darajasiga koʻtarish, xalqimiz turmush farovonligini yanada oshirish, Oʻzbekistonning dunyodagi eng ilgʻor davlatlari qatoriga kirishiga ulkan imkoniyatlar yaratadi.

Tadbir tashkilotchilari barchani 30-aprel kuni boʻlib oʻtadigan referendumda faol qatnashishga chaqirdilar.

Manzura Ulugʻberdiyeva,

Oʻzbekiston “Adolat”SDP Sherobod tuman “Ayollar qanoti” Kengashi faoli.