Baxtiyorlar vatani bu–Oʻzbekiston

Tinch va osuda vatanning begʻubor havosidan toʻyib –toʻyib nafas olar ekanmiz, qalbimiz gʻururga toʻladi. Biz shundayin tengsizlar ichra tengsiz, imkoniyatlar makoni boʻlgan yurt farzandlarimiz. Asrlar silsilasidan matonat bilan oʻtib, istiqlol yillarida koʻhna tariximiz, bebaho maʼnaviy merosimiz, muqaddas dinimiz, urf odat va anʼanalarimiz ham qayta tiklanganiga shukronalar qilamiz. Chunki, bugun Oʻzbekiston, degan jannatmakon diyor borligini butun dunyo biladi. Bugun mehr-oqibat, bagʻrikenglik, hamjihatlik kabi oliyjanob fazilatlar, milliy va umumbashariy qadriyatlarga hurmat, Vatan taqdiri va kelajagiga daxldorlik tuygʻusi yuragimizning qaridan munosib oʻrin oldi.

Mamlakatimiz mustaqilligining 32 yilligi misli koʻrilmagan islohotlar va taraqqiyot yillari boʻldi, deyishga haqlimiz. Ilm, fan, taʼlim, madaniyat, sogʻliqni saqlash, iqtisodiyot va boshqa sohalarda erishilgan yutuqlar har birimizni yangi marralarni zabt etishga undaydi.

Prezidentimizning joriy yilning 27-28-iyulʼ kunlari Fargʻonaga tashrifi, turli soha vakillari va xalq bilan yuzma –yuz muloqotlarda ular tomonidan bildirilgan samimiy va hayajonli iqrorlarning barchasi xalqning bugungi kunidan shukronasi va hayotidan mamnunligi emasmi? Mustaqillik — xalqimizga oʻz taqdirining haqiqiy egasi ekanligi, qadr-qimmatini anglashda, munosib hayot kechirish, yurtimizda huquqiy demokratik davlat va fuqarolik jamiyatini barpo etish imkoniyatini yaratadi. Ayni paytda u har bir odamning iqtisodiy, ijtimoiy sohalarda isteʼdod va qobiliyatini toʻla namoyon etishi, huquq va erkinliklarini roʻyobga chiqarishining mustahkam zaminidir.

Darhaqiqat, mustaqillik tufayli oʻzligimizni angladik, ozod xalq, mustaqil davlat sifatida Oʻzbekistonning bor boʻy-bastini, ulkan salohiyatini butun dunyoga namoyon qilish imkoni ochildi. Mustaqilligimiz sababli bizni jahon tanidi, xalqimizning fidokorona mehnati, yoshlarimizning gʻayrati, azm-u- shijoati ila vatanimizning shon-shuhrati olam uzra yanada kengroq yoyilmoqda.

Raqamlarga murojaat qiladigan boʻlsak, Fargʻona viloyatida oʻtgan yil yakuniga koʻra oʻzlashtirilgan xorijiy investitsiyalar hajmi 957,4 million dollarni tashkil etadi. Bu 2021-yilgi koʻrsatkichga nisbatan oʻsish darajasi 445 million dollarga yoki 187 foizga teng boʻldi. Mamlakatimizda yaratilayotgan qulay investitsiya muhiti hududlarda istiqbolli loyihalarni amalga oshirish imkonini bermoqda. Viloyat iqtisodiyotiga investitsiyalar kiritish boʻyicha Xitoy, Rossiya Federatsiyasi, Shveysariya, Janubiy Koreya, Germaniya, Singapur va Turkiya davlatlari yetakchilik qildi. Fargʻonaga investitsiya kiritgan mamlakatlarning umumiy soni bugungi kunda 30 taga etdi. Sanoat, farmatsevtika, taʼlim, qishloq xoʻjaligi mahsulotlarini qayta ishlash sohalari investorlar uchun eng jozibador boʻlib qoldi. IT va innovatsion texnologiyalar sohalari ham yaxshi oʻsish dinamikasini koʻrsatdi. Bularning barchasi viloyatimiz misolida davlatimizni dunyoda oʻz oʻrniga ega boʻlib borayotganidan dalolat emasmi?

2022-yilda Standard & Poorʼs xalqaro reyting agentligi (S&P Global Ratings) tomonidan viloyat byudjetining yuqori koʻrsatkichlari hamda tijoriy qarzdorlikning mavjud emasligi alohida eʼtirof etilib, Fargʻona viloyatiga B+ darajasidagi “Barqaror” prognozi kredit reytingini berilgani ham xorijiy sarmoyadorlar uchun viloyatning investitsiya jozibadorligini yanada oshirdi. Xorijiy investorlar va tadbirkorlarga yaratib berilayotgan bir qator qulay sharoitlar natijasida viloyatda faoliyat yuritayotgan xorijiy kapital ishtirokidagi korxona soni bugungi kunga kelib 596 taga yetkazildi. 2020-yilga nisbatan ushbu korxonalar soni 188 taga koʻpayishiga erishildi.Bu raqamlar ortida xalqimizning azm-u- shijoati, tadbirkorlarning qatʼiyati va vatan taqdiriga daxldorlik bilan tun-u kun izlanishda boʻlgani va mehnatlari samarasi emasmi? Aytish oʻrinliki, mehnatkash xalqimiz uchun muhimi tinchlikning barqarorligi, ularning mehnatlari qadrlanishi bugungi jamiki yutuqlarning salmogʻini ortishiga zamin yaratmoqda.

“Har bir kun – bu imkoniyat, har bir kun – bu kelajak uchun poydevor” degan hayotiy shior mohiyatida biz shu olamshumul yutuqlarni anglab qalbimiz gʻururga toʻladi. Mamlakat mustaqilligining 32 yillik bayrami “Yangi hayot uchun, Yangi Oʻzbekiston uchun!” degan bosh gʻoyani oʻzida mujassam etgani bilan yanada qadrlidir.

Adolat” SDP Fargʻona viloyat Kengashi jamoasi bu ulugʻvor maqsadlar vatanning nurli kelajagi va xalqning bugungidan-da baxtli va farovon hayoti uchun ekanligini eʼtirof etishdan, xalqimizning har bir qatlamiga yetkazishdan charchamaydi.

                                                      Bunyod Ahmadaliyev,

                          “Adolat” SDP Fargʻona viloyat Kengashi rais oʻrinbosari.