Bilimdonlar bellashdi

Oʻzbekiston Respublikasi Prezidentining “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida” PQ-92-sonli qarori ijrosini taʼminlash maqsadida Oqqoʻrgʻon tumanida qator ishlar amalga oshirilmoqda.

Bugun Oqqoʻrgʻon tumani “Birlik” MFY hududidagi Tarix va Oʻlkashunoslik muzeyida tuman hokimligi, “Adolat” SDP Oqqoʻrgʻon tuman Kengashi, Tuman Barkamol avlod bolalar maktabi, Tuman Axborot kutubxona markazi hamkorligida tashkil etilgan intellektual oʻyin yoshlarni bir maqsad, bilim va tafakkur sari birlashtirdi.

 “Zakovat” intellektual oʻyini davomida “Maʼnaviyat”, “Adolat” va “Barkamol avlod” jamoalari oʻzaro bellashib, “Maʼnaviyat” jamoasi gʻoliblikni qoʻlga kiritdi.

 Gʻolib va sovrindorlar munosib taqdirlandilar.

Bundan koʻzlangan maqsad – yoshlarni vatanparvarlik, milliy anʼana va qadriyatlarimizga hurmat ruhida tarbiyalash, maʼnaviy yetuk va jismonan sogʻlom barkamol avlodni voyaga yetkazishdan iborat.

  –Yoshlar ongi va qalbida mustaqillik gʻoyalariga sodiqlik, milliy oʻzlikni anglash, Vatanga muhabbat va uning taqdiriga daxldorlik, fidoyilik hissini qaror toptirish muhim vazifalardan sanaladi,– deydi Oʻzbekiston “Adolat” SDP Xalq deputatlari Oqqoʻrgʻon tuman Kengashi deputati Alisher Qurbonov –Bu borada yoshlarning ilmiy va badiiy kitoblar, jumladan, elektron asarlarni oʻqishga boʻlgan qiziqishini yanada oshirish juda muhim. Bunday bellashuvlar esa ularning siyosiy va huquqiy bilimlarini oshirish barobarida kitob bilan oshno, doʻst qilishda yaxshi samara beradi.

“Zakovat” intelektual oʻyini soʻnggida jamoalarning tuman tarix va oʻlkashunoslik muzeyiga sayohati tashkil etildi.

“Adolat” SDP Toshkent viloyati Kengashi Matbuot xizmati.