Bilimga chanqoq Yangi Oʻzbekiston yoshlari

Yurtimizda hali istiqlol bayrami epkinlari esib yurgan shu damlarda taʼlim muassasalarida ham bugun birinchi qoʻngʻiroq jarang sochdi. Viloyatimizdagi 10 dan ortiq oliy va 1000 dan ziyod umumtaʼlim oʻrta maktablari oʻz bagʻriga minglab oʻgʻil-qizlarimizni qarshi oldi.

Bugun bilimlar kuni munosabati bilan Oʻzbekiston “Adolat” SDP faollari ham maktablarda boʻlib, pedagog va oʻquvchilar quvonchiga sherik boʻlishdi. Xalq deputatlari Qashqadaryo viloyat Kengashi deputati Maqsuda Mustafoyeva Qarshi shahridagi 11-maktabda bilimlar kuni munosabati bilan tashkil etilgan tantanali marosimda ishtirok etib, oʻquvchi va oʻqituvchilarni bayram bilan qizgʻin muborakbod etdi.

-Yangi Oʻzbekiston kelajagi maktabda,-dedi Maqsuda Mustafoyeva.-Prezidentimiz alohida taʼkidlaganlaridek, chuqur bilimga ega boʻlmasdan farovon hayotga erishib boʻlmaydi. Shuning uchun ham aziz oʻquvchilar davlatimiz tomonidan yaratib berilayotgan keng imkoniyatlardan toʻgʻri va oʻrinli foydalanib, fan sirlarini mukammal egallangiz. Yaxshi bilim egasi boʻlsangiz hamma joyda qadr topasiz.

Xalq deputatlari Qarshi shahar Kengashi deputati, partiya faoli Chamangul Muhammadiyeva ham bugun Qarshi shahridagi 15 –umumtaʼlim oʻrta maktabiga tashrif buyurib, bilimlar kuni munosabati bilan maktab jamoasi va oʻquvchilar, ota-onalarni qizgʻin muborakbod etdi. Taʼlim sohasida amalga oshirilayotgan keng qamrovli islohotlar, taʼlimga joriy etilayotgan innovatsion yangiliklar xususida maʼruza qildi.

Shuningdek, Oʻzbekiston “Adolat” SDP faollari Oʻzbekiston Qahramoni Muhabbat Sharopova, Abduqaxxor Axmedov, Mavjuda Jumayeva, Qoʻyli Narzullayev va boshqalar ham viloyatdagi taʼlim muassasalarida tashkil etilgan tadbirlarda ishtirok etib, taʼlimni yanada rivojlantirish, tizimga ajratilayotgan cheksiz mablagʻlar, sohaga oid qabul qilinayotgan yangi qonunlar xususida toʻplanganlarni voqif etishdi.

Vohadagi barcha taʼlim muassasalarida bilimlar kuni koʻtarinki ruhda oʻtdi.

                                                          Nilufar Xushvaqtova,

                                                          Partiya faoli.