Bilimlar kunining ilk sabogʻi

Jizzax shahridagi 3-umumtaʼlim maktabida darslar an’anaga ko’ra “Mustaqillik darsi” bilan boshlandi. “Yangi Oʻzbekiston uchun,Yangi hayot uchun!” shiori ostida oʻtkazilgan mazkur mustaqillik darsida mehnat faxriylari, mahalla faollari, bugungi kunda katta hayot maktabini oʻtagan sobiq oʻquvchilar va xalq vakillari ishtirok etib, oʻquvchilarga bugungi dorilamon kunlarga yetib kelganga qadar boshlaridan kechirgan mashaqqatlari haqida gapirib, oʻquvchi yoshlarni mustaqilligimizni asrab-avaylashga, qadrlashga,vatan ravnaqi yoʻlida masʼuliyat hissi bilan yashash va mehnat qilishga chorlashdi.

Tadbirda ishtirok etgan “Adolat” SDP Jizzax viloyat Kengashi raisi Orif Shukurov, kelajak sari intilayotgan yoshlarga Vatanni sevish haqiqiy baxt ekanligi, mamlakatimiz tinchligini asrab-avaylash, uning taraqqiyotiga hissa qoʻshish har bir farzandning burchiga aylanishi, asosiysi, bu niyat va maqsadlarga erishish yoʻlida oʻquvchilar kuchli bilimga ega boʻlishi, odob-axloq, tarbiya bilan kamolga yetishi zarurligini alohida taʼkidlab oʻtdi.

Mazkur tadbir ishtirokchilarda katta taassurot qoldirdi. Maktabga ilk qadam qoʻygan birinchi sinf oʻquvchilariga Oʻzbekiston Respublikasi Prezidenti sovgʻasi tantanali ravishda topshirildi.

“Adolat” SDP Jizzax viloyat Kengashi

Matbuot xizmati.