Boʻlajak filologlar tomonidan Qonun loyihasiga takliflar berildi

Ayni paytda, Oʻzbekiston Respublikasining “Bolalarni zoʻravonliklarning barcha shakllaridan himoya qilish toʻgʻrisida” gi Qonun loyihasining mazmun-mohiyati keng jamoatchilik eʼtiboriga havola qilinib, takliflari yigʻilmoqda.

Xususan, “Adolat” SDP Xorazm va Urganch shahar Kengashlari hamkorligida Urganch davlat universitetining “Filologiya” fakultetida mazkur Qonun loyihasining mazmun va mohiyatiga bagʻishlangan, partiya faollari, deputatlar, oʻqituvchi va talabalar ishtirok etgan davra suhbati ham yuqori darajada tashkil etildi.

Tadbirni “Tarix va filologiya” fakulteti dekani, partiya faoli Nargiza Masharipova kirish soʻzi bilan ochib berdi. “Adolat” sotsial-demokratik partiyasi yetakchi partiyalardan biri boʻlib, partiya tomonidan amalga oshirilayotgan asosiy masalalarning hayotga tatbiq etilishi natijasida, partiya saylovchilar ishonchini oqlab, xalqimiz orasidagi taniluvchanligi tobora oshib borayotgani toʻgʻrisida qayd etildi.

Shundan soʻng,   partiya faollari tomonidan   ushbu Qonunning maqsadi bolalarni zoʻravonlikning barcha shakllaridan himoya qilish sohasidagi munosabatlarni tartibga solishdan iborat ekani hamda mazkur Qonunning mazmun-mohiyati toʻgʻrisida hayotiy misollar bilan tushuntirib berildi.

Ulugʻbek Safarboyev, talaba, tadbir ishtirokchisi:

Tadbir juda ham samarali, ishtirokchilarning faolligida qizgʻin kechdi.Xozirgi kunda bolalar zoʻravonligi juda ham dolzarb muammoga aylanib borayotgan hech kimga sir emas. Bu toʻgʻrida alohida Qonun qabul qilinishini juda oʻrinli deb bilaman. Partiya faollari tomonidan Qonun loyihasining mazmun va mohiyati juda aniq qilib izohlab berildi. Qonun loyihasiga koʻplab talabalar qatori men ham takliflarimni berdim.  

Tadbir davomida ishtirokchi talabalarning mazkur Qonun loyihasi toʻgʻrisidagi ilgari surilgan fikr va mulohazalari hamda takliflari tadbir saviyasini oshirishga xizmat qildi.

Tadbir soʻngida faol ishtirok etgan oʻqituvchi va talabalarga partiyaning esdalik sovgʻalari topshirildi.

                                                                                               Zamira Abdullayeva,

          “Adolat” SDP Xorazm viloyat Kengashi matbuot kotibi.