Boʻlajak shifokorlarning ona tilimizga boʻlgan hurmati mustahkamlandi

Oʻzbek tiliga davlat tili maqomi berilganiga 34 yil toʻlishi munosabati bilan mamlakatimiz boʻylab madaniy-maʼrifiy tadbirlar tashkil etilmoqda

Shu munosabat bilan bugun Toshkent Tibbiyot akademiyasi Urganch filiali talabalari orasida “Ona tili – millat ruhi” mavzusida davra suhbati tashkil etildi.Tadbirda partiya faollari, deputatlari hamda boʻlajak talabalar ishtirok etishdi. Tadbirni oʻtkazishdan asosiy maqsad- tilimizni eʼzozlash, uning davlat tili sifatidagi maqomi, jamiyatdagi mavqeyini yuksaltirish, yosh avlodni ona tiliga hurmat ruhida tarbiyalashdan iborat boʻldi.

Tadbirda soʻzga chiqqanlar tomonidan oʻzbek tilining huquqiy maqomini belgilashda yengib oʻtilgan qiyinchiliklardan tortib hozirgi kunda tilimizning boy imkoniyatlaridan keng foydalanish uchun yaratilgan shart – sharoitlar hamda davlat tilini yangi pogʻonaga olib chiqish borasida mamlakatimizda amalga oshirilayotgan islohotlar alohida eʼtirof etildi. Tadbir davomida oʻzbek tilining xalqaro miqyosdagi obroʻ-eʼtiborini yuksaltirish uchun uni milliy va umumbashariy tushunchalar asosida taraqqiy etgan tillar safiga kiritishda oʻz hissamizni qoʻshishimiz zarurligi hamda har birimizdan tilimizga chuqur hurmat bilan yondashishni talab etilishi tadbir davomida alohida qayd etildi va ona tilimizni sofligicha kelajak avlodga qoldirish masʼuliyatiga eʼtibor qaratildi.

Mangubek Bekturdiyev, tadbir ishtirokchisi:

— Oʻzbek tilini davlat tili maqomiga koʻtarilishi uchun ajdodlarimiz necha asrlar kurashib kelgani, bugun shu orzular ushalganiga 34 yil toʻlgani, oʻz tilimizni asrash va uni har tomonlama rivojlantirish maqsadida bir qator meʼyoriy hujjatlar qabul qilinib, hayotga tatbiq etilayotgani hamda ona tilimizni yuqoriga koʻtarish, yoshlar orasida nutq ravonligini va nutq sanʼatini yuqori pogʻonaga koʻtarish, sof ona tilimizni butun dunyoga tanitish,oʻzbek tilini nafaqat Oʻzbekistonda balki, butun dunyoda ravon gapiradigan insonlarni koʻpaytirish toʻgʻrisidagi fikr va mulohazalar diqqat markazimizdan joy oldi va zimmamizga ulkan masʼuliyat yukladi.

Tadbir soʻngida tilimizning naqadar rang barangligi, uning jozibasi va sofligini saqlab qolish uchun har birimiz masʼul ekanimiz toʻgʻrisida fikrlar almashildi va yoshlar qiziqqan savollariga atroflicha javoblar olishdi.

Vohamizda bu kabi tadbirlar davom etmoqda.

Zamira Abdullayeva,
“Adolat” SDP Xorazm viloyat Kengashi matbuot kotibi.