Bolalar huquqlari qonun bilan himoya qilinadi

“Adolat” SDP Siyosiy Kengashining topshirigʻiga binoan, partiyaning Surxondaryo viloyat Kengashi hamda shahar va tuman Kengashlari tomonidan umumiy oʻrta taʼlim maktablarida, Maktabgacha taʼlim tashkilotlari hamda Mehribonlik uylarida bolalarga nisbatan tazyiq va zoʻravonlik oʻtkazishning oldini olishga qaratilgan huquqiy mexanizmlarni kuchaytirish boʻyicha “Bolalarni zoʻravonliklarning barcha shakllaridan himoya qilish toʻgʻrisida”gi Oʻzbekiston Respublikasi Qonuni loyihasining muhokamalariga bagʻishlangan tadbirlar tashkil etilmoqda.

Xususan, Termiz shahridagi 1-umumiy oʻrta taʼlim maktabida partiya Surxondaryo viloyat Kengashi va viloyat IIB hamkorlikda mazkur qonun loyihasiga bagʻishlangan tadbir oʻtkazildi. Tadbirda partiya faollari, deputatlari, hamkor tashkilot vakillari, maktab pedagoglar jamoasi, yuqori sinf oʻquvchilari va OAV vakillari ishtirok etishdi.Davra suhbatida Oʻzbekiston “Adolat” SDP viloyat Kengashi vakillari va viloyat ichki ishlar boʻlimi masʼul xodimlari tomonidan qonun loyihasi yuzasidan batafsil maʼlumotlar berdi.

  Barno Amanova, Termiz shahar 1-umumtaʼlim maktabi direktori:

- Aytish kerakki, bugungi globallashuv davrida kreativ dunyoqarashga ega, sogʻlom va har tomonlama barkamol avlodni shakllantirish oldimizda turgan muhim vazifalar hisoblanadi. Bolalarning himoyasi esa har birimiz uchun dolzarb mavzudir. Tadbirda soʻzga chiqqanlar   ushbu muhokamadagi Qonunning maqsadi, mazmun va mohiyati toʻgʻrisida tushunchalar berildi. Qonunni qabul qilishdan asosiy maqsad- bolalarni zoʻravonlikning barcha shakllaridan himoya qilish sohasidagi munosabatlarni tartibga solishdan iborat ekani taʼkidlandi. Zoʻravonlikdan jabrlanuvchi, shuningdek oʻzlariga nisbatan zoʻravonlik sodir etilishi xavfi ostida boʻlgan bolalarga bir qator omillarni oʻz ichiga olgan zarur huquqiy, iqtisodiy, ijtimoiy, psixologik, tibbiy va boshqa yordam koʻrsatilishi, jabrlanuvchi va xavf ostidagi bolalarning eng ustun manfaatlarini taʼminlash maqsadida ularning oila aʼzolariga, shu jumladan zoʻravonga nisbatan xavf omillarini bartaraf etishga qaratilgan oilani mustahkamlovchi va qoʻllab-quvvatlovchi xizmatlar koʻrsatilishi taʼkidlandi.

Hududlarda bu kabi tadbirlar davom etadi.

 Dilafroʻz Rahmatova,

Oʻzbekiston “Adolat” SDP Surxondaryo viloyat Kengashi bosh mutaxassisi.