Bolalar va yoshlar uchun tavsiya etilmaydigan mahsulotlar

“Adolat” SDP Nishon tuman Kengashi va hamkor tashkilotlar tomonidan Prezidentimizning “Aholining sogʻlom ovqatlanishini taʼminlash boʻyicha qoʻshimcha chora-tadbirlar toʻgʻrisida”gi qarori ijrosini taʼminlash maqsadida madaniyat markazi tadbirgohida “Toʻgʻri ovqatlanish va sogʻlom turmush tarzi” mavzusida targʻibot tadbiri boʻlib oʻtdi. Unda asosan xotin-qizlar, yoshlar va bolalar muassasalari masʼullari qatnashdilar.

Mamlakatimizda xalq farovonligini oshirish, sogʻligʻini har tomonlama muhofaza qilishga alohida eʼtibor berilyapti. Prezidentimiz saʼy harakati bilan aholi orasida yuqumli boʻlmagan kasalliklarning oldini olish, sogʻlom turmush tarzini shakllantirish va jismoniy faollik darajasini oshirish maqsadida “Toʻgʻri ovqatlanish va sogʻlom turmush tarzi” umummilliy harakati yoʻlga qoʻyilmoqda. Bu haqda 2023 yilgi davlat dasturi loyihasida ham ustuvor vazifa etib belgilangan.

-Bugungi targʻibot tadbirini oʻtkazishdan maqsad ham yoshlar va bolalar oʻrtasida toʻgʻri ovqatlanishni targʻib qilishdan iboratdir,-dedi xalq deputatlari Nishon tumani Kengashi deputati Gullola Beknazarova.- Buning natijasida aholi, ayniqsa, bolalar va yoshlar, ayollar va keksalar orasida sogʻlom ovqatlanishni tashkil qilish va jismoniy faollikni targʻib qilish hisobiga yuqumli boʻlmagan kasalliklarning oldini olish, zararli odatlar va nosogʻlom turmush tarzini kechirish oqibatlari boʻyicha mutaxassislar tomonidan tushunchalar berilyapti. Bundan tashqari, bolalar va yoshlar muassasalari masʼullariga internet orqali ham targʻibot qilyapmiz. Smartfon va mobil ilovalar yordamida oʻz sogʻligʻi va ovqatlanishini nazorat qilishni oʻrgatish, toʻgʻri ovqatlanish boʻyicha mobil ilova yaratilmoqda.

 -Sogʻlom turmush tarziga rioya etish, uni oʻsib kelayotgan yosh avlodning ong-u shuuri madaniyatini oʻstirish sira kechiktirib boʻlmaydigan vazifalardan hisoblanadi,- dedi partiya faoli Sirojiddin Egamberdiyev.- taʼlim muassasalarida bolalar va yoshlar uchun tavsiya etilmaydigan mahsulotlar, shu jumladan tarkibida shakar, tuz, trans yogʻlar miqdori yuqori boʻlgan oziq-ovqat mahsulotlari, taʼm va rang beruvchi qoʻshimchalar roʻyxatini tasdiqlash va isteʼmolini kamaytirish lozim. Har bir muassasada mahalliy mahsulotlar turlaridan kelib chiqib, yosh avlodning har bir xavf guruhi va kasallik turlari uchun alohida-alohida sogʻlom ovqatlanishga qaratilgan tavsiyalarni ishlab chiqish payti keldi. Bolalar, oʻsmirlar yoshi, tana tuzilishi, turmush tarzi va kasalliklarga moyilligidan kelib chiqib, bolalar, kattalar va keksalar uchun toʻgʻri ovqatlanish, sogʻlomlashtirish mashqlari va gigiyena qoidalari toʻplamini yaratish zarur. Shuni unutmaslik kerakki istiqbolimiz egalari kamol topayotgan muassasalarda farzandlarimizning jismoniy tarbiya bilan shugʻullanishi va sogʻlom ovqatlanishi uchun zarur shart-sharoitlarni yaratish darkor.

Tadbirda bolalar muassasalari masʼullari mutaxassislar va partiya faollaridan kun tartibidagi masala yuzasidan oʻzlarini qiziqtirgan koʻpdan-koʻp savollarga javoblar oldilar.

 Shaxlo Tursunova,

partiya faoli.