“Bolalarning zoʻravonlikning barcha shakllaridan himoya qilish” toʻgʻrisidagi loyihasi keng muhokama qilindi

Bugun yurtimizda bolalar huquqlari himoyasini mustahkamlash, xususan ularni zoʻravonlikning barcha shakllaridan himoya qilish, bu borada qonunchilik normalarini takomillashtirish, ayrim holatlar yuzasidan yangi qonunlarni qabul qilish borasida keng qamrovli islohotlar amalga oshirilmoqda.

Xususan, “Bola huquqlari toʻgʻrisida” Konvensiya ratifikatsiya qilinib, oʻtgan davr mobaynida milliy qonunchiligimiz ham xalqaro standartlarga moslashtirilmoqda.

Soʻnggi yillarda amalga oshirilayotgan keng koʻlamli islohotlar qatorida bola huquqlari va qonuniy manfaatlari himoyasi sohasida ham tub oʻzgarishlar amalga oshirilgan.

Ayniqsa, Prezidentimizning qatʼiy siyosiy irodasi bilan mamlakatimizda majburiy mehnatga, bolalar mehnatiga butkul barham berilganini, bunday holatlarga nisbatan davlatda ham, jamiyatda ham murosasiz munosabat shakllandi.

Milliy taraqqiyotimizni belgilab beruvchi strategiyalar doirasida bu borada koʻplab ishlar amalga oshirildi. Bolalar huquq va manfaatlarini taʼminlashda mohiyatan tub oʻzgarishlar roʻy berdi.

 “Adolat” SDP ham oʻz saylovoldi dasturida ayollar va bolalarga nisbatan zoʻravonlikning oldini olish masalasiga keng eʼtibor qaratgan.

Shundan kelib chiqib, partiya bola huquqlarini himoya qilish, jamiyatda ularga nisbatan zoʻravonlikning har qanday koʻrinishiga qarshi murosasizlik ruhini shakllantirishda qator tadbirlarni amalga oshirib kelmoqda.

Oʻzbekiston “Adolat” SDP Toshkent viloyati Kengashi va Boʻstonliq tumani FXDYO boʻlimi, tuman IIB hamda tuman mudofaa ishlari boʻlimi oʻzaro hamkorligida Boʻstonliq tumanidagi 2-sonli umumiy oʻrta taʼlim maktabida davra suhbati tashkil etildi.

“Bolalarni zoʻravonlikning barcha shakllaridan himoya qilish toʻgʻrisida”gi qonun loyihasi muhokamasiga bagʻishlangan davra suhbatida bolalarni zoʻravonlikdan muhofaza qilishdagi dolzarb masalalar boʻyicha soʻz yuritildi.

Yangilangan Bosh qomusimizda bola huquqlari kafolatlariga alohida eʼtibor qaratilgani eʼtirof etildi.

Bolalarning huquq va manfaatlari buzilishiga olib kelayotgan holatlarni bartaraf etish maqsadida Adliya vazirligi tomonidan ishlab chiqilgan “Bolalarni zoʻravonlikning barcha shakllaridan himoya qilish toʻgʻrisida”gi qonun loyihasi mazmun-mohiyati muhokama qilindi.

Davra suhbatida bildirilgan fikrlar asosida qayta ishlangan loyiha kelgusida bolalarga nisbatan sodir etilayotgan turli shakllardagi zoʻravonlik holatlarini oldini olish, jabrlanuvchilarning ijtimoiy, huquqiy, tibbiy va maʼnaviy holatini yaxshilash borasidagi jiddiy qadamlar uchun huquqiy asos boʻlib xizmat qilishi taʼkidlandi.

Loyiha boʻyicha tadbir ishtirokchilarining taklif va mulohazalari tinglandi.

“Adolat” SDP Toshkent viloyat Kengashi Matbuot xizmati.