“Bor mehrimiz senga, bolajon!” – ezgu maqsadga eltuvchi aksiya

Oʻzbekiston “Adolat” sotsial-demokratik partiyasi Toshkent viloyati Kengashi tashabbusi bilan viloyatning Chirchiq shahridagi Toshkent viloyati qon quyish stansiyasida 1-iyun – “Xalqaro bolalarni himoya qilish kuni” munosabati bilan   “Bor mehrimiz senga, bolajon!” shiori ostida begʻaraz donorlik aksiyasi tashkil etildi.

Xayriya tadbiridan koʻzlangan asosiy maqsad, tibbiy-ijtimoiy koʻmakka muhtoj fuqarolarni qoʻllab-quvvatlash, insonlarni koʻngilli ravishda qon topshirishga chaqirish orqali bemorlarning hayotini saqlab qolish, jamiyatda insonparvarlik va mehr-oqibat gʻoyalarini keng targʻib qilishdan iborat. 

“Adolat” sotsial-demokratik partiyasi tomonidan mazkur aksiya har yili ikki marta oʻtkazib kelinmoqda. Ushbu shior ostidagi tadbir yuzlab kishilarni qonga muhtoj boʻlgan bemor bolajonlarga hayot bagʻishlash va ularning sogʻayib ketishlariga hissa qoʻshishdek xayrli va savobli ish uchun birlashtiradi.

Erta tongdan boshlangan mazkur aksiyada partiyaning barcha xodimlari, xalq deputatlari tuman va shahar Kengashi deputatlari, partiya faollari, yoshlar hamda koʻngillilar ishtirok etdi.

Tadbir yakunida faollik koʻrsatgan davlat va jamoat tashkilotlari vakillariga va yoshlarga partiya Toshkent viloyati Kengashining “Tashakkurnoma”si topshirildi.

Oʻzbekiston “Adolat” SDP Toshkent viloyati Kengashi
Matbuot xizmati.