Bosh qomusimizga kiritilgan har bir oʻzgartirishlar, inson manfaatlari uchundir

Аyni kunlarda “Adolat” sotsial demokratik partiyasi faollari 30 aprel kuni boʻlib oʻtadigan “Oʻzbekiston Respublikasi Konstitutsiyasi toʻgʻrisida”gi konstitutsiyaviy qonun loyihasi yuzasidan hududlarda tashviqot tadbirlarini tashkil etib, Bosh qomusimizga kiritilayotgan xalqchil oʻzgarishlarning mazmun-mohiyatini tushuntirib berishda jonbozlik koʻrsatmoqda.Shunday tadbirlardan biri Pastdargʻom tuman kengashi tomonidan Temurxoʻja mahallasida joylashgan “Temurxoʻja” toʻyxonasida tashkil etildi.Uchrashuvda soʻz olganlar, Bosh qomusimizga kiritilayotgan oʻzgartishlarning mazmun-mohiyati, uning inson huquqlarini himoya qilishga doir muhim jihatlari xususida maʼlumotlar berdi. Shu bilan birgalikda, inson huquq va erkinliklarini taʼminlash – davlatning oliy majburiyati etib belgilanmoqda. Inson va davlat organlari oʻrtasidagi yuzaga keladigan noaniqliklar inson foydasiga talqin qilinishi, huquqiy taʼsir choralari qonuniy maqsadga erishish uchun yetarli va mutanosib boʻlishi kerakligi belgilanmoqda. Ushbu qoidalar inson huquqlari ustuvorligini taʼminlaydi, davlat idoralarining oʻz vazifalarini inson huquqlariga rioya qilgan holda amalga oshirishda masʼuliyatini oshiradi hamda insonga meʼyoridan ortiq huquqiy taʼsir choralari qoʻllanilishining oldini oladi.

Konstitutsiyada insonning shaxsiy huquqlari va erkinliklari kafolati eng ilgʻor xalqaro standartlarga muvofiq kuchaytirilmoqda. Ilk marotaba yozishmalar, telefon orqali soʻzlashuvlar, pochta, elektron xabarlar va boshqa xabarlarni sir saqlash huquqi faqat sudning qaroriga asosan cheklanishi mumkinligi belgilanmoqda. Yaʼni, hozirgi vaqtda ushbu vakolat prokurorga tegishli boʻlib, uning sudlarga oʻtkazilishi shaxs daxlsizligi va konstitutsiyaviy huquqlarini taʼminlashda tub burilish boʻladi. Bundan tashqari yana, shaxs qarindoshlarining sudlanganligi asosi bilan huquqlari cheklanishi mumkin emasligi qatʼiy belgilanishi inson oʻzining yaqinlari yoʻl qoʻygan xatolar uchun javob bermasligini taʼminlashi qayd etib oʻtildi. Tadbir soʻnggida tashkilotchilar yigʻilganlarni referendumda faol ishtirok etishga chaqirishdi.

Muzaffara Abdiyeva,

Oliy Majlis Qonunchilik palatasi deputati.