Boshlangʻich partiya tashkilotlari – partiya faoliyatida muhim omil

     Siyosiy partiyalarning xalq orasida oʻz mavqeyini mustahkamlashda, fuqarolar orasida oʻz faoliyatini samarali amalga oshirishda boshlangʻich partiya tashkilotlarining oʻrni beqiyosdir. Aynan mana shu tuzilma barcha siyosiy partiyalar, shu jumladan “Adolat” sotsial demokratik partiyasi uchun ham aholi bilan bevosita ish olib borishda asosiy oʻrinni egallashi bilan ahamiyatlidir.
     Hozirgi kunda partiyamiz loyihalari doirasida olib boriladigan oʻrganishlar, tashkil etilayotgan tadbirlar, davra suhbatlarida boshlangʻich partiya tashkilotining aʼzolari oʻz tashabbuslari bilan faol tarzda ishtirok etib kelishmoqda.
     Bugun “Adolat” SDP Doʻstlik tuman Kengashi tomonidan boshlangʻich partiya tashkilotlarining faoliyatini yanada jonlantirish, olib borilayotgan ishlar samaradorligini oshirish maqsadida “Boshlangʻich partiya faoliyatining tashkiliy, huquqiy mexanizmlarini takomillashtirish – “Adolat” SDP faoliyatida muhim omil” mavzusida davra suhbati tashkil etildi.
     Tumandagi 1-sonli umumtaʼlim maktabning majlislar zalida boʻlib oʻtgan mazkur tadbirda partiyaning tuman Kengashlari xodimlari, deputatlar, hamkor tashkilotlar, partiyaning boshlangʻich partiya tashkilotlari raislari va aʼzolari, faollar hamda OAV vakillari ishtirok etishdi.
     Mazkur davra suhbatini tashkil etishdan koʻzlangan asosiy maqsadlardan biri bu – partiya qurilishi, partiyalardagi vaziyatni tahlil qilish, partiyalar faoliyatining mamlakat ijtimoiy- siyosiy hayotiga taʼsir qilish jarayonlarini tahlil qilish barobarida ichki partiyaviy tashkiliy faoliyatga nazar tashlashdir.
     Tadbirda partiyaning Doʻstlik tuman Kengashi raisi Muhammad Yalgashev soʻzga chiqib, partiya tomonidan boshlangʻich boʻgʻinlar faoliyatini puxta tashkil etish — partiyaning jamiyatdagi mavqeyini mustahkamlashda hal qiluvchi omil ekanligini, boshlangʻich partiya tashkilotlar faoliyatini keskin jonlantirish partiya oldida turgan ustuvor masalalardan biri ekanligini taʼkidlab oʻtdi.
     Haqiqatdan ham, boshlangʻich partiya tashkilotlarining samarali faoliyati partiya hayotida muhim ahamiyat kasb etadi. BPTlar qanchalik faol boʻlsa, partiya faoliyati samaradorligi taʼminlanadi, aʼzolar soni koʻpayadi.
     Ochiq muloqot tusini olgan mazkur davra suhbatida tinglovchilar partiya faoliyati samaradorligini oshirish koʻrsatkichlarini aniqlay bilish, siyosiy dastur, nizom va boshqa hujjatlarni mustaqil tahlil eta olish, partiya tadbirlarida ishtirok etish va uni tayyorlay olish kabi koʻnikmalarga ega boʻlishdi.

“Adolat” SDP Jizzax viloyat Kengashi
Matbuot xizmati.