Bugun OMQP deputatlari Shofirkon tumanida....

Oliy Majlis Qonunchilik palatasi deputatlari — Tavakkal Choriyev va Qodir Joʻrayevlar Shofirkon tumanida boʻlishib, tuman hokimining birinchi oʻrinbosari Nodir Rahmonov hamrohligida Mingchinor kichik sanoat zonasida boʻldilar.

Bu yerda qiymati 192,8 mlrd. soʻmlik 4 ta istiqbolli loyihalar, jumladan, “BUXORO FARMATSEVTIKA SANOATI” MCHJ tomonidan farmatsevtik mahsulotlarni qadoqlash, “NURLI BOGʻ 2020” MCHJ tomonidan meva-sabzavot, dukkakli ekinlar va poliz mahsulotlarini qayta ishlash, zamonaviy muzlatgich qurish va bioorganik oʻgʻitlar ishlab chiqarish, “Said Mironshoh kulol” OK tomonidan qurilish materiallari, gazoblok, penoblok ishlab chiqarish yoʻlga qoʻyilishi rejalashtirilgan.

Deputatlar kichik sanoat zonasida boʻlish mobaynida loyihalar holati bilan tanishib, tadbirkorlarga amaliy koʻmak koʻrsatish xususida oʻrganish olib bordi hamda holat yuzasidan mutasaddilarga tegishli koʻrsatmalar berildi.
Shuningdek, deputatlarning navbatdagi yoʻnalishi Mingchinor hududida faoliyat olib borayotgan “Buxoro zarhal teks” agroklasteriga qarashli “Mingchinor chevarlari” MCHJda ham boʻldi.

70 nafar ishchi oʻrniga ega tikuv sexida ekosumkalar ishlab chiqarish yoʻlga qoʻyilgan boʻlib, loyiha qiymati 2.5 mlrd. soʻm, shundan tashabbuskorning oʻz mablagʻi 0.5 mlrd. soʻm, bank krediti mablagʻlari 2.0 mlrd. soʻmni tashkil etadi.

Jarayonda sex faoliyatini koʻzdan kechirgan deputatlar ishlab chiqarishda tadbirkorning muammosi mavjud yoki yoʻqligi bilan qiziqishib, loyiha tashabbuskori bilan suhbatda MCHJ faoliyatiga doir oʻz fikr va takliflarini bildirdilar.
Tumanda joylashgan yirik loyihalarni oʻrganishlar mobaynida Oliy Majlis Qonunchilik palatasi deputatlari “Buxoro zarhal teks”ga qarashli yogʻ ishlab chiqarish zavodini ham koʻzdan kechirdilar.

Zavod mutasaddilari bilan muloqotda korxonani ishga tushirish va bu orqali yangi ish oʻrinlarini yaratishga doir masalalar yuzasidan fikr almashildi.

Bundan tashqari deputatlar tumandagi “Qalmaqon” MFY sida ham boʻlib, mahalla faoliyati bilan yaqindan tanishib, mavjud muammolarni oʻrganishdi.

Mohigul Rahimqulova
“Adolat” SDP Buxoro viloyat Kengashi matbuot kotibi.