Chimboyda targʻibot tadbiri

Oʻzbekiston “Adolat” SDP Qoraqalpogʻiston Respublikasi Kengashi tomonidan 30-aprel kuni oʻtkaziladigan umumxalq referendumi munosabati bilan yangi Konstitutsiyaning mazmun-mohiyatini xalqimizga keng tanishtirish maqsadida barcha shahar va tumanlarda targʻibot tadbirlari oʻtkazilib kelinmoqda.

Ana shunday tadbirlarning biri joriy yil 18-aprel kuni Chimboy tumanida joylashgan 49-sonli umumtaʼlim maktabida “Yangilanayotgan Konstitutsiya – inson qadri uchun” mavzusida “Shaxtemir” mahalla fuqarolar yigʻinida yashovchi aholi vakillari uchun targʻibot tadbiri oʻtkazildi.

Tadbirda partiya Qoraqalpogʻiston Respublikasi Kengashi raisi Nurlibay Qaipbergenov, partiya hududiy Kengashi raisi oʻrinbosari Rauaj Otarbayev, Xalq deputatlari Chimboy tumani Kengashi deputati Azatjan Xudaybergenova, “Shaxtemir” mahallasi fuqarolari hamda ommaviy axborot vositalari vakillari ishtirok etishdi.

Tadbirni partiya Qoraqalpogʻiston Respublikasi Kengashi raisi Nurlibay Qaipbergenov kirish soʻzi bilan ochib berdi va boshqarib bordi.

Dastlab partiya Qoraqalpogʻiston Respublikasi Kengashi raisi oʻrinbosari Rauaj Otarbayev soʻzga chiqib, Bosh Qomusimizga kiritilayotgan va yangilanayotgan normalarning asosiy maqsadi inson qadr qimmati va uning shaʼni, manfaatdorligi uchun xizmat qilishi maqsad qilib olinganligini hamda yangilanayotgan Konstitutsiya xalqimiz Konstitutsiyasi, chunki loyihani ishlab chiqishda xalqimizning xohish irodasi, ulardan kelib tushgan takliflarning toʻrttasidan bittasi oʻrin olganligi bilan ahamiyatli ekanligini taʼkidladi.

Tadbir davomida partiya Qoraqalpogʻiston Respublikasi Kengashi raisi Nurlibay Qaipbergenov oʻz soʻzida, islohotlarga yuz tutgan Oʻzbekistonga endilikda zamon talabiga mos va munosib boʻlgan ushbu yangilanayotgan Konstitutsiya hayotiy zarurat ekanligini eʼtirof etib, 30-aprel kuni oʻtkaziladigan umumxalq referendumi yurtimizning muhim siyosiy jarayonlaridan bir ekanligini aytib oʻtdi.

Shundan soʻng, Xalq deputatlari Shimboy tumani Kengashi deputati Azatjan Xudaybergenova soʻzga chiqib, bugungi tadbir doirasida yangi Konstitutsiyaning mazmun-mohiyatiga va maʼruzachilar tomonidan keltirilgan maʼlumotlarga umumiy toʻxtalib, barchani 30-aprel kuni oʻtkaziladigan referendumga befarq boʻlmaslikga chaqirdi.

Tadbir yakunida ishtirokchilar oʻzlarining qiziqtirgan savollariga javoblar olishib, fikr va mulohazalar tinglandi.

Oʻzbekiston “Adolat” SDP
Qoraqalpogʻiston Respublikasi
Kengashi matbuot xizmati