Chirchiq shahrida saylovchilar bilan uchrashuv bo‘lib o‘tdi

Joriy yilning 9 iyun kuni Toshkent viloyati Chirchiq shahridagi “Kimyogarlar” madaniyat saroyida O‘zbekiston Respublikasi Prezidentligiga “Adolat” sotsial-demokratik partiyasidan ko‘rsatilgan nomzod Maxmudova Robaxon Anvarovnaning Toshkent viloyatidagi saylovchilar bilan uchrashuvi bo‘lib o‘tdi.

Tadbirda partiya faollari, deputatlar, mehnat faxriylari, faol xotin-qizlar va yoshlar, shuningdek, ommaviy axborot vositalari vakillari ishtirok etdilar.

Uchrashuvni Prezidentlikka nomzodning Toshkent viloyatidagi ishonchli vakili – “Adolat” SDP viloyat Kengashi deputati Gulnora Ahmedova kirish so‘zi bilan ochib berdi. Ishonchli vakil ishtirokchilarga nomzodning tarjimayi holi va faoliyati to‘g‘risida atroflicha maʼlumot berib o‘tdi.

Shundan so‘ng Prezidentlikka nomzod Robaxon Maxmudova so‘zga chiqib, o‘z Saylovoldi dasturida ilgari surilgan ustuvor g‘oyalar, maqsadlar, asosiy masalalarni saylovchilar eʼtiboriga havola etdi.

Nomzodning Saylovoldi dasturida Vatanimiz taraqqiyoti yo‘lida huquqiy demokratik, ijtimoiy davlat va barcha uchun farovonlik taʼminlangan adolatli fuqarolik jamiyati qurishning sotsial-demokratik modeli taklif etilayotganligi taʼkidlandi.

Xususan, nomzod dasturida inson, uning huquqlari, erkinliklari va qonuniy manfaatlari davlat va jamiyatning eng yuksak qadriyatlari ekanligi tan olinib, jamiyat va davlat hayotining barcha jabhalarida har bir insonning farovon hayot kechirishi uchun zarur shart-sharoitlar yaratish, ijtimoiy adolat va qonun ustuvorligini taʼminlash, mamlakatimizni erkinlik, adolatlilik, birdamlik, ijtimoiy himoya va masʼuliyat tamoyillari hukmronlik qiladigan, insonlarning keskin tabaqalanishiga yo‘l qo‘yilmaydigan kuchli ijtimoiy davlat sifatida, aholining yuqori turmush darajasiga ega rivojlangan davlatlar qatoriga qo‘shilishiga erishish kabi vazifa va maqsadlarga alohida eʼtibor qaratilgan.

Qolaversa, dasturda xalq davlat hokimiyatining birdan-bir manbai ekanligi haqidagi konstitutsiyaviy prinsip davlat siyo­satining ustuvor yo‘nalishi sifatida taʼkidlanib, xalq hokimiyatining yorqin timsoli bo‘lmish vakillik demokratiya­­si institutining roli va ahamiyatini yana-da oshirish, mamlakat iqtisodiyotining barqaror rivojlanishini taʼminlash, jamiyatning innovatsion, intellektual salohiyatini ro‘yobga chiqarish va inson kapitalini rivojlantirish kabi masalalarda izchil takliflarning ilgari surilayotgani yig‘ilganlarda katta qiziqish uyg‘otdi.

Konstruktiv ruhda, qizg‘in savol-javoblarga boy bo‘lgan uchrashuv so‘nggida tadbir qatnashchilari yurt ravnaqi, fuqarolar farovonligini taʼminlovchi muhim siyosiy tadbirlarda faol ishtirok etishlarini bildirishdi.

O‘zbekiston Respublikasi Prezidentligiga nomzod Robaxon Maxmudovaning saylovchilar bilan uchrashuvlari davom etadi.

“Adolat” SDP Toshkent viloyat Kengashi
Axborot xizmati