“Choshtepa”da aholi boshqaruv-servis kompaniyalaridan norozi

Oliy Majlis Qonunchilik palatasi deputati Agzamova Gulruh Anvarovna joriy yilning 5-yanvar kuni oʻzi saylangan okrugida boʻlib, fuqarolar bilan muloqot qildi.

Yangihayot va Sergeli tumanida oʻtkazilgan uchrashuvlarda “Yangi Choshtepa”, “Jaloyir”, “Kengmakon” mahallalari aholisining koʻplab muammolari oʻrtaga tashlandi.

Jumladan, Yangihayot tumanidagi “Yangi Choshtepa” mahalla idorasida boʻlib oʻtgan uchrashuvda 45 ta koʻp qavatli uyda istiqomat qiluvchi aholi vakillari, mahalla raisi hamda 12 ta koʻp qavatli uyning uyboshilari ishtirok etdi. Maʼlumki, Vazirlar Mahkamasining 581-sonli qarori boʻyicha koʻp qavatli uylarga xizmatlar endilikda boshqaruv-servis kompaniyalari orqali amalga oshiriladi. Hududdagi aholi “Choshtepa-Sergeli” uy-joylarga xizmat koʻrsatuvchi boshqaruv-servis kompaniyasi ishidan norozi ekanligini bildirishdi. Aytilishicha, 3 yildan buyon kommunal va boshqa toʻlovlarni davlat byudjetiga oʻtkazmasdan kompaniya rahbari “tuya” qilib yuborgan. Uning koʻrsatayotgan xizmatlaridan 3 yil avval hududdagi aholida norozilik kayfiyati boshlanib, xizmat rad qilinishiga qaramay, A.Abdullayev hech narsa boʻlmaganday shartnomasiz faoliyat yuritib kelavergan. Bu boʻyicha mahalla ahli bir necha marotaba yuqori turuvchi organlarga murojaat qilgan boʻlishiga qaramay joʻyali javob ololmagan. Shu bois, koʻplab kvartiralarda aholi qarzdorligi kelib chiqayotganligi boʻyicha shikoyatlar yangradi. Ayrim fuqarolar toʻlagan summasi uchun kvitansiya qogʻozi ham olmagan.

Yigʻilishda ishtirok etgan tuman hokimining oʻrinbosari Abdurashid Nurmatov hamda 1-sektor kotibi Ilhom Adhamovlar Oliy Majlis Qonunchilik palatasi deputati Gulruh Agzamova bilan ushbu muammoga bahamjihat yechim izlash choralarini koʻrishdi. Ular joriy boshqaruv-servis kompaniyasi rahbari A.Abdullayevni tegishli javobgarlikka tortish kerakligi va barchasi sudda hal qilinishi boʻyicha taklif aytdilar. Bu aholi tomonidan maʼqullandi va ulardan tegishlicha bayonnomalar rasmiylashtirilib, har bir koʻp qavatli uyning holatga munosabati boʻyicha yozma roziligi olinadigan boʻldi. Shu yerning oʻzida ushbu hudud aholisiga “Number one servis” boshqaruv-servis kompaniyasi rahbari Marvarid Abdukadirovaning xizmatlari taklif etildi. Tuman hududida bunday kompaniyalardan yana 14 tasi bor. Kerakli taqdimot xizmatdan foydalanuvchilarga taqdim etilgandan soʻnggina ulardan biri bilan tegishlicha shartnoma tuziladigan boʻldi.

Mehriniso YAKUBOVA,

“Adolat” SDP Toshkent shahar kengashi matbuot kotibi