Davlat dasturi taraqqiyotning - yangi bosqichi

Davlatimiz rahbari Shavkat Mirziyoyev tomonidan “2022–2026 yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi qabul qilindi.

Mazkur Davlat dasturidagi ustuvor gʻoyalar mavjud barcha sohalardagi oʻzgarish va yangilanishlar, eng avvalo, yurtimizning barcha fuqarolari farovonligi, ularning hayotdan rozi boʻlgan holda yashashiga erishishi lozimligiga qaratilgani bilan ahamiyatlidir. Qolaversa, mazkur yilga moʻljallangan Davlat dasturida ham koʻp yillar mobaynida oʻz yechimini topmay, saqlanib kelayotgan ijtimoiy muammolarni hal etishiga katta ahamiyat berilgan.

Shu bilan birgalikda, Harakatlar strategiyasining mantiqiy davomi boʻlgan Taraqqiyot strategiyasiga muvofiq ishlab chiqilayotgan maqsadli dasturlar, insonlarning turmush darajasi va sifatini yanada oshirishni taʼminlashga qaratilgani bilan bir qatorda yaqin va oʻrta istiqbolda Oʻzbekistonning taraqqiyot tendensiyalari, davlat va jamiyat hayotining barcha jabhalarini kompleks rivojlantirish yoʻnalishlari aniq belgilangan.

Mazkur Davlat dasturning eʼtiborga molik yana bir muhim jihati shundaki, uni ishlab chiqishda xalqimizni qiynab kelayotgan muammolar eʼtiborga olindi, qilinishi lozim boʻlgan dolzarb vazifalar belgilab berildi. Eng muhimi, hujjatning ishlab chiqilishida xalqimiz ham oʻz fikrlari bilan faol ishtirok etishdi.

Taraqqiyot strategiyasida 7 ta ustuvor yoʻnalish boʻyicha “Inson qadri uchun – 100 ta maqsad” belgilab olingan.

Davlat dasturi xalqimizning ogʻirini engil qilish, aholi uchun qoʻshimcha qulayliklar yaratish va ularning xarajatlarini tejash, fuqarolarning pensiya taʼminotini yaxshilash va pensionerlarni qoʻllab-quvvatlash, nogironlikni belgilashda fuqarolarga qoʻshimcha engilliklar yaratish, Yangi Oʻzbekiston” massivlarini rivojlantirish va aholining uy-joyga boʻlgan talabini qondirish, taʼlim sifatini oshirish, sohani ilgʻor xorijiy tajriba asosida isloh qilish, aholiga birlamchi tibbiy xizmatlarni yaqinlashtirish va fuqarolarni sifatli tibbiy xizmatlar bilan taʼminlash, kasalliklarni erta bosqichda aniqlash, shuningdek, bemorlarga qoʻshimcha qulayliklar yaratish kabi vazifalar amalga oshiriladi.

Mahmud ХOLBOEV,
“Adolat” SDP Jizzax viloyat Kengashi
yetakchi mutaxassisi.