Deputat aholi murojaatlarini oʻrgandi

Oʻzbekiston “Adolat” sotsial-demokratik partiyasi deputatlari oʻz saylov okruglarida boʻlib, odamlarni oʻylantirayotgan masalalarni oʻrganmoqda. Aholi bilan yuzma-yuz muloqotlarda koʻtarilgan muammolarni tegishli mutasaddilar bilan birgalikda hal etish choralari koʻrilmoqda.

Oʻzbekiston “Adolat” sotsial-demokratik partiyasidan saylangan Angren shahar Kengashi deputati Anvar Nurmatov Angren shahar hududida rejalashtirilgan uchrashuvlarni oʻtkazib, saylovchilarning murojaatlarini oʻrgandi.

Xalq noibi “ Oppartak ” mahalla fuqarolar yigʻinida fuqarolar bilan muloqot qildi. Mazkur fuqarolar bilan qilingan muloqotda koʻchalarni obodonlashtirish, moddiy yordam, bandlik, uy-joy, yoʻllarni taʼmirlash kabi oʻnlab muammo yuzasidan murojaat kelib tushdi. Eng koʻp murojaat aholi salomatligi borasida boʻldi.

Fuqaroning murojaati eʼtiborga olinib, tegishli mutasaddilarga yoʻnaltirildi.

— Bugun bizdan hol-ahvol soʻrab kelgan deputatlardan umidimiz katta, – deydi tuman aholisi. — Biz ularga ishonch bildirib, nomzodlarini qoʻllab-quvvatlagandik, oradan koʻp oʻtmay muammolarimizni oʻrganishga kelishgani bizni xursand qildi. Eʼtibor markazida ekanligimizni murojaatlarimiz yechimi joyida hal etilayotgani asnosida his etdik.

Albatta, uzoq vaqtdan buyon hal boʻlmay kelayotgan masalalarning hammasiga birgina uchrashuv doirasida yechim topish mushkul. Muhimi, ular oʻz tashvishlarini xalq vakillariga ishonishmoqda, muammolarini yechishda ularga suyanishmoqda.

Oʻzbekiston “Adolat” SDP Toshkent viloyati kengashi

Matbuot xizmati.