Deputat bogʻchaning tomini taʼmirlab berdi

“Adolat” SDP Sergeli tumani kengashi raisi Sh.Xoʻjayeva hamda xalq deputatlari Toshkent shahar kengashi deputati Sobir Turdiyevich Tursunov ishtirokidagi ishchi guruhi Sergeli tumanidagi 329-umumtaʼlim maktabi holatini yaqindan oʻrgandi.

Taʼkidlash lozimki, u yerdagi shart-sharoitlar bugungi kun zamon talablariga javob berib, oʻquvchilar va ota-onalarni quvontirib kelmoqda. Har qanday zamonaviy maktablar bilan raqabotlasha oladigan maktab ekanligi tahsinga loyiq.

Oʻquvchilar ham bunga munosib ravishda harakat qilib kelishmoqda. 5 nafar oʻquvchi “Regbi” sport turidan oliy oʻrinlarni egallab, maktabni tamomlamaslaridan turib universitetlarda oʻqish imkoniyatini qoʻlga kiritishgan.

Yaqinda maktabga elektron doska oʻrnatilgan va oʻquvchilar undan bemalol foydalanishyapti. Doska xarajati uchun byudjetdan 200 mln. soʻm mablagʻ sarflangan.

Deputat Sobir Tursunov oʻquvchilarning bilim darajasi bilan ham qiziqdi. Ularga baʼzi savollar berib ijobiy va qoniqarli javoblar oldi.

Shuningdek, oʻrganish jarayonida maktab oshxonasida yaratilgan sharoitlar bilan ham tanishildi. Barcha oshxona jihozlari sozligiga alohida eʼtibor qaratildi. Aytish kerakki, oʻquvchilar ovqatlanishi uchun barcha shart-sharoitlar mavjud. SamPIN meʼyorlariga mos keladi.

Oʻtgan yildan boshlab maktabda smart sinflar tashkil etilgan va bu oʻzining yaxshi natijasini bergan. Bundan tashqari, Prezidentimiz Murojaatnomasiga asosan aynan shu yilda kasbga yoʻnaltirish boʻyicha oʻquv kurslari tashkil etilgan.

Xulosa qilganda, maktabda oʻqituvchi va oʻquvchilar uchun barcha sharoitlar muhayyo qilingan.

Shuningdek, deputat Sobir Turdiyevich Tursunov ishtirokidagi ishchi guruhi Sergeli tumanidagi 599- Maktabgacha taʼlim tashkilotini ham borib oʻrgandi.

Deputat tomonidan oʻtgan yilda xalq deputatlari Toshkent shahar Kengashi sessiyasiga ushbu MTT bilan bogʻliq masala kiritilib, bogʻcha tom qismi toʻliq yangidan rekonstruksiya qilinishi belgilangan edi.

Joriy yilda ushbu taʼmirlash ishlari nihoyasiga yetkazildi. MTT maʼmuriyati va bolalar bundan juda xursand boʻlishmoqda.

Mehriniso Yakubova,

“Adolat” SDP Toshkent shahar Kengashi matbuot kotibi.