Deputat Boysun tumanidagi muammolarni oʻrgandi

Ayni kunlarda Xalq deputatlari Surxondaryo viloyat Kengashi deputati Rustam Hamrayev Boysun tumanida boʻlib saylovchilar bilan yuzma-yuz muloqotlar qilmoqda.

Xususan, tumandagi “Ariq usti” mahalla fuqarolar yigʻinida saylovchilar bilan uchrashib, ularning fikrlarini, takliflarini, turli masalalardagi murojaatlarni joyiga chiqqan holda oʻrganyapti.

Deputat mahalladagi ijtimoiy obyektlardan mahalla hududidagi 7-sonli 180 oʻringa moʻljallangan davlat maktabgacha taʼlim tashkiloti faoliyatini oʻrganishdan boshladi. Bogʻcha qurilish ishlari ishlari 2 yil oldin tugatilib foydalanishga topshirilgan boʻlsa-da, isitish tizimida muammolar borligi aniqlandi. Bogʻcha qurilishi “Boysun qurilish santexnika” MCHJ tomonidan amalga oshirilgan boʻlib, isitish tizimida issiq suv aylanishi nosoz boʻlganligi uchun oʻtgan 2 yil davomida qish mavsumida bogʻcha binosi xonalari talab darajasida isitilmagan. Xalq vakili shu yerning oʻzida masalaga yechim topish maqsadida “Boysun qurilish santexnika” MCHJga murojaat qilib bogʻchadagi isitish tizimidagi muammolarni bartaraf qilish boʻyicha koʻrsatma berdi.

Deputatimiz mazkur mahallada joylashgan 47-sonli umumtaʼlim maktabida ham oʻrganishlar olib bordi. Mazkur maktab oʻtgan asrning 60-yillarida qurilgan boʻlib hozirgi vaqtda oʻquv binosi, eshik romlari hamda sport zali taʼmirtalab holatda ekanligi aniqlandi. Oʻrganishlarda maktab oʻquv binosi poydevorida yoriqlar paydo boʻlganligi va yerga choʻkish holatlari mavjudligi aniqlandi. Maktabda ikki smenada oʻquv olib borilsa-da, qoʻshimcha toʻgaraklar va mashgʻulotlar oʻtkazish imkoniyati mavjud emasligi maʼlum boʻldi. Shuningdek, maktabda faollar zali, oshxona taʼmirga muhtoj. Maktabda sinfxonalar yetishmasligi sababli maktabning qoʻshimcha binoga ehtiyoji bor. Deputat mazkur muammoni bartaraf etish yuzasidan tuman Xalq taʼlimi boʻlimiga deputatlik soʻrovi yubordi.

Shuningdek, deputatimiz aholi bilan boʻlgan yuzma yuz muloqotlarda mahalla hududidagi koʻp qavatli uylar ahvoli bilan tanishdi. Mazkur yangi qurilgan turar joylarga tumandagi “Shohjahon boshqaruv servis” MCHJ tomonidan xizmat koʻrsatilishi belgilangan boʻlib, oʻrganishlar davomida mavjud turarjoy binolari tashqi fasad qismlarida boʻyash ishlari yaqin orada olib borilmaganligi, ayrim xonadonlarga yomgʻir suvlari oʻtishi qayd etildi. Bundan tashqari turarjoy binosi chiqindixonalari tozalanmaganligi aholining haqli eʼtiroziga sabab boʻlmoqda. Shuningdek, ushbu hududda ichimlik va oqova suv muammosi ham mavjuddir. Mazkur muammoni ham hal qilish uchun deputat tuman hokimligi mutasaddilariga deputatlik soʻrovi yubordi.

Yana shuningdek, mahalla hududidagi “Hayot abadiy”, “Mehridaryo”, “Nuroniy” va “Shalola” ichki koʻchalari tekshirilganda ushbu koʻchalardagi 4 km ichki yoʻllarga asfalt yotqizish ishlari amalga oshirilmaganligi maʼlum boʻldi. Mazkur masalani mahalla faollari va tuman “Yoʻlqurilish” korxonasi mutasaddilari tomonidan tez orada bartaraf qilinishi bildirildi.

Deputatning hududlardagi oʻrganishlari davom etmoqda.

Gulshod Tursoatova,

Oʻzbekiston “Adolat” SDP Surxondaryo viloyat Kengashi matbuot kotibi.