Deputat faqat xalq manfaatlari uchun xizmat qiladi

Bugun shiddat bilan kechayotgan globallashuv jarayonlari insoniyat uchun bir qancha muammolarni yuzaga keltirmoqda. Bu, ayniqsa, milliy mentalitet, tarbiya va urf-odatlar umumlashuvi jarayonlarida yanada yaqqol namoyon boʻlmoqda. Bu esa oʻz-oʻzidan har bir mamlakat oʻzining rivojlanish strategiyasida milliy boshqaruv tizimini isloh qilishini taqozo etmoqda. Shu nuqtayi nazardan, mamlakatimizda olib borilayotgan islohotlar zamirida inson huquq va erkinliklarini taʼminlash, ularga barcha shart-sharoitlarni, farovon yashash imkoniyatlarini yaratib berish muhim ahamiyatga egadir.

Bugungi kun talablarini yaxshi anglagan xalq deputatlari Samarqand viloyat Kengashi deputati Ilhomjon Toʻxtasinov Samarqand shahridagi xorijiy migratsiya­dan qayt­gan, jinoyat sodir etgan, jinoyatchilikka moyil, profilaktik nazoratda, probatsiya roʻyxatida turgan va nogironligi mavjud boʻlgan 62 nafar yoshlar bilan alohida yondashuv asosida ish bosh­ladi.

Deputat jamiyatda yoshlar faolligini oshirish, ularni mentalitetimizga yot turli gʻoya va qarashlar taʼsiridan himoyalash maqsadida mahallalarda uchrashuvlar tashkil etdi. Bunda yordamga muhtoj boʻlgan yoshlarga ularning talablari, ehtiyojidan kelib chiqib qurilish anjomlari, sartarosh­xona anjomlari, nout­buk, bir million soʻmdan bir martalik pul mab­lagʻlari taqdim etildi.

Xalq deputatlari viloyat Kengashi deputati Inobat Bobo­qulova sayyor qabullarda mamlakatimizda xotin-qizlar va bolalar huquqlari, erkinlik­lari hamda qonuniy manfaatlarini tazyiq va zoʻravonlikdan ishonchli himoya qilishning ins­titutsional hamda huquqiy asos­larini tubdan takomillashtirishga, bolalar tomonidan huquqbuzarliklar sodir etilishining oldini olishga, shuning­dek, nogironligi boʻlgan hamda ota-ona qaramogʻidan mahrum boʻlgan bolalarni davlat tomonidan qoʻllab-quvvatlashga qaratilgan keng koʻlamli ishlar amalga oshirilayotganini qayd etib oʻtdi. Shuningdek, xotin-qizlarning huquqlari, erkinlik­lari hamda qonuniy manfaatlarini ishonchli himoya qilish bilan bogʻliq masalalarda bir qator muammolar mavjud edi. Xususan, xotin-qizlar va bolalarning huquqlariga daxl qiluvchi jinoiy qilmish­lar uchun mutanosib sanksiyalar belgilanmagani, xotin-qizlarni shilqimlik va zoʻravonlikdan himoya qilishning huquqiy kafolatlari mavjud emasligi, tazyiq va zoʻravonlikdan jabrlangan shaxsga davlat himoyasini taqdim etuvchi orderning amal qilish muddati (oʻttiz kun) xotin-qizlarning huquqlari hamda qonuniy manfaatlari yetarli darajada himoya qilinishini taʼminlash imkonini bermasligi, alimentlarni toʻlamaganlik uchun jazo sifatida jarima solinishi yanada koʻproq moliyaviy qiyinchiliklarni keltirib chiqarayotganini oʻz saylovchilariga alohida taʼkidlab oʻtdi.

Xalq deputatlari Samarqand viloyat Kengashi deputati Sanobar Mirsaidovaning aholi bilan sayyor qabullari jarayonida aholining ehtiyojmand, kam taʼminlangan oilalar murojaatlari ijobiy hal etilib kelinmoqda. Jumladan, davolanish uchun yordam soʻragan Mashhura Rajabova, Nozima Uzoqovaning iltimosiga koʻra, deputat viloyat Sogʻliqni saqlash bosh boshqarmasiga yuborgan soʻrovlar oʻz vaqtida koʻrib chiqildi va tez orada oʻzining ijobiy natijasini berdi. Har ikkala ayol maxsus davolanish maskanlariga joylashtirilib, jarrohlik amaliyoti muvaffaqiyatli amalga oshirildi. Ayni vaqtda murojaatchilar oʻzlariga koʻrsatilgan yordam, eʼti­bor va gʻamxoʻrlikdan behad minnatdor. Bu esa bugungi kun deputati xalq vakili sifatida aholining chin koʻmakchisiga aylanganidan, el-yurt koriga hamisha kamarbasta ekanligidan dalolat beradi.

Xalq deputatlari Samarqand shahar Kengashi deputati Muhiba Bababekova ham yoshlarni qoʻllab-quvvatlash masalasiga alohida eʼti­bor qaratgan. Deputat ilm­­ga chanqoq, intiluvchan va tirishqoq yoshlarni qoʻllab-quvvatlash maqsadida, 3 yildirki Nur­obod tumanida joylashgan 11-son umumtaʼlim maktabining iqtidorli yoshlarini bir martalik moddiy mablagʻ (stipendiya) bilan taqdirlab kelmoqda. Ushbu stipendiya maktab pedagogik jamoalarining taklifiga binoan oʻquv yili yakunlari boʻyicha aʼlo baholarga oʻqigan eng faol oʻquvchilarga berib boriladi. Ushbu yangi gʻoya va amaliy harakat maktab oʻquvchilari tomonidan qizgʻin kutib olindi va oʻquvchilarning yanada koʻproq bilim olish­lariga, izlanishlariga, oʻz qobiliyatlarini namoyon etish­lariga asos boʻlmoqda.

Mamlakatimizda inson manfaatlari eng oliy qadriyat sifatida qaraladi. Shu nuqtayi nazardan aholi salomatligini mustahkamlash, farovon kelajagini taʼminlash yoʻlida keng koʻlamli islohotlar amalga oshirilmoqda. Xalq deputatlari Samarqand viloyati Kengashi deputati Tozagul Xoliqova oʻz okrugi hududidagi koʻplab mahallalarda “Ayollar daftari” da turuvchi xotin-qizlarni qoʻllab-quvvatlab, ularga amaliy koʻmak berib kelmoqda. Jumladan, deputat tashabbusi bilan joriy yil boshidan beri 20 dan ortiq mana shunday ijtimoiy koʻmakka muhtoj xotin-qizlarga moddiy yordam koʻrsatildi.

Gulnafisa Abdimurodova,

Samarqand viloyat kengashi matbuot kotibi.