Deputat saʼy-harakati bilan 100 nafar fuqaro oʻz-oʻzini band qildi

Xalq deputatlari Qashqadaryo viloyat Kengashidagi Oʻzbekiston “Adolat” SDP deputatlik guruhi aʼzolari shu kecha-kunduzda aholi oʻrtasida Oʻzbekiston 2030 strategiyasini keng targʻib etishyapti. Shu bilan birga aholi xonadonlariga tashrif buyurib, odamlar bilan yuzma-yuz muloqot ham uyushtirilmoqda.

Deputatlik guruhi aʼzosi Oʻzbekiston Qahramoni Muhabbat Sharopovaning Qarshi shahridagi Xudoyzot MFY fuqarolari bilan yuzma-yuz muloqoti ayniqsa samarali kechdi. Odamlar oʻzlarini qiynab kelayotgan turli masalalar bilan deputatga yuzlanishdi. Muammolarning asosiy qismi deputat ishtirokida joyida hal etildi.   Mahalla raisi “Adolat” SDP faoli Aʼzam Karimovning murojaati esa oʻrganishni taqozo etdi. Mahalla ichki yoʻllarini oʻrgangan deputat qisqa muddatlarda 18 ta koʻchani asfalt qilishga ehtiyoj borligini aniqladi. Bu muammo shahar hokimligi va uning tasarrufidagi masʼul idoralar masʼullari ishtirokida 100 foiz bartaraf etiladigan boʻldi.

Qarshi shahridagi “Ishga marhamat” monomarkazida 37 ta yoʻnalishda kasbga tayyorlash uchun oʻquv kurslari tashkil etilgan. Uni hozirgacha 11 ta kasb, yaʼni tikuvchi, ayollar sartaroshi, kosmetolog, neylstilist, oshpaz, qandolatchi, afitsiant-batler, uqalovchi, yosh bolalar uchun enaga, yordamchi tarbiyachi, kichik mehr-shafqat hamshirasi kabi yoʻnalishlar boʻyicha 150 nafardan ortiq fuqaro tamomladi.Oʻquv kurslarini bitirgan ishsiz fuqarolarni ish bilan bandligini taʼminlashni deputat Muhabbat Sharopova nazoratga olganligi, tegishli idoralarga oʻz muddatida xat bilan chiqqanligi bois , 7 nafari ishli boʻldi. 100 nafari esa oʻz-oʻzini band qildi. 6 nafari subsidiya olgan, qolganlari ham boshqa yoʻnalishda oʻz faoliyatini davom ettirmoqda.

  — Hozir ham monomarkazlarda 200 nafardan ortiq tinglovchilar kasb-hunarga oʻqitilmoqda,-deydi partiyadoshimiz Muhabbat Sharopova.-Oʻquv kurslarini muvaffaqiyatli tamomlaganlar esa oʻz faoliyatini yoʻlga qoʻyib, oilalariga moddiy daromad olib kirish barobarida, boshqalarni ham ish bilan taʼminlayotgani partiyamiz oʻz oldiga qoʻygan maqsadlarimizga erishayotganimizdan dalolatdir.

                                                  Husniddin Berdimurodov,

                                                        Partiya faoli.