Deputat sa’y-harakati bilan mahallalar ichki yo’llari obod etilyapdi

Davlatimiz rahbari tashabbusi bilan “Xavfsiz va ravon yoʻl” tamoyili asosida aholining turmush tarzini yangi bosqichga koʻtarish uchun katta ishlar amalga oshirilyapti. Bu borada ayniqsa, deputatlar ham alohida namuna koʻrsatishmoqda.

Qarshi shahridagi Aralovul MFY fuqarolari partiyaning “Adolat qabulxonasi”ga murojaat qilib, mahalladagi 25 ta koʻchaning ichki yoʻllarini   asfalt yoki toshli toʻshama qilib berishda amaliy yordam soʻrashgan. Ushbu fuqarolar murojaati asosida xalq deputatlari Qarshi shahar Kengashi deputati Husniddin Berdimurodov aholi bilan yuzma-yuz muloqot oʻtkazib, ularning murojaatlari oʻrinli ekanligini aniqladi va shahar obodonlashtirish boshqarmasi boshligʻiga   hamda tegishli idoralar masʼullari nomiga shu yil iyul oyida deputatlik soʻrovi yuborgan edi.

Ayni paytda mutasaddilar tomonidan mahalla ahlining ehtiyojiga mos keladigan ichki yoʻllar va piyodalar yoʻlaklarini qurish hamda taʼmirlash, yoʻllar boʻyini obodonlashtirish va koʻkalamzorlashtirish, tashqi yoritish tizimlarini barpo etishga kirishildi. Yil oxirigacha 4 kilometrdan ortiq ichki yoʻllar taʼmirlanib asfalt qilish choralari koʻrilyapti. Qudratli texnikalar yordamida mahalla infratuzilmasi yaxshilanmoqda.

Aholi farovonligini yanada oshirish borasida amalga oshirilayotgan bu kabi xayrli ishlardan mahalla aʼzolari mamnun.

                                              Akmal Hayitov,

                  “Adolat” SDP Qarshi shahar Kengashi raisi.