Deputat saylovchilari bilan uchrashdi

Oliy Majlis Qonunchilik palatasi deputatlari har oyda oʻz saylov okruglarida boʻlib, saylovchilari bilan uchrashib, hududning ijtimoiy-iqtisodiy rivoji, mavjud holat yuzasidan oʻrganishlar olib borishi anʼanaga aylangan.

Oliy Majlis Qonunchilik palatasi deputati Yelena Kompoltshik ham saylov okrugidagi saylovchilari bilan uchrashuv oʻtkazish maqsadida ayni paytda Samarqand viloyatda boʻlib turibdi. Deputat dastlab partiyaning viloyat Kengashi binosiga tashrif buyurib, uchrashuv davomida amalga oshirilishi lozim boʻlgan ishlar borasida partiya follari bilan fikrlashib oldi.

Shundan soʻng deputat Samarqand shahridagi Bogʻi saroy, Zulfiya mahalla fuqarolari yigʻinida partiyaning viloyat Kengashi xodimlari hamrohligida fuqarolar bilan yuzma-yuz muloqot oʻtkazib, murojaatlarini tingladi.

Mahalla fuqarolari tomonidan oʻrtaga tashlangan, aholi bandligini taʼminlash masalasida koʻtarilgan muammolarga oʻzining taklif va tavsiyalarini berib oʻtdi. Deputat hududda jinoyatchilikni oldini olish, “Temir daftar”, “Ayollar daftari” va Yoshlar daftari”ga kiritilgan fuqarolarning ushbu daftarlar roʻyxatidan chiqarish borasida oʻtgan davr mobaynida amalga oshirilgan ishlar hamda kelgusida rejalashtirilgan tadbirlari bilan qiziqdi. Oʻzining tegishli tavsiya va takliflarini bildirdi.

Shu bilan birga deputat Samarqand viloyat perenatal markazi, 4-sonli tugʻruq majmuasida boʻlib, u yerda aholi uchun yaratilgan mavjud shart-sharoitlar bilan tanishdi. Shifokorlar, soha xodimlari bilan suhbatlashib, taklif, fikr-mulohazalarini tingladi.

Shifokorlar tomonidan bildirilgan takliflar, xususan, 250 koyka oʻringa moʻljallangan ushbu maskanda ayni kunda 400 dan ortiq bemor mavjudligi, kunlik qabuldan kelib chiqqan holda koykalar sonini oshirish, yangi qoʻshimcha bino zarurligi borasida oʻrtaga tashlangan masalalarni deputat oʻz nazoratiga olishini, vakolati doirasida mutasaddilar eʼtiborini ushbu masalaga qaratgan holda ijobiy yechim topishga koʻmaklashishini maʼlum qildi.

Lola Sayidova,
Oʻzbekiston “Adolat” SDP
Samarqand viloyat Kengashi raisi oʻrinbosari