Deputat tashabbusi bilan ichki yoʻllar taʼmirlandi

Ayni kunda nosoz yoʻllarni sozlash, ayniqsa, qishloqlardagi taʼmirtalab yoʻllar, xususan, ichki yoʻllarni taʼmirlash, obodonlashtirish ishlari jadal suratlarga kirganligi eʼtiborga molik. 

Ayniqsa, bu borada deputatlarimiz tomonidan olib borilayotgan savobli ishlar muhim ahamiyat kasb etadi. Ana shunday savob ishlarga bosh qoʻshayotgan xalq noiblaridan biri Xalq deputatlari Muzrabot tuman Kengashi deputati Jamshid Amanovdir. U zimmasidagi masʼuliyatni yaxshi anglagan holda bir necha yillardan buyon tuman aholisini qiynab kelayotgan bir qancha muammolarini oʻrganib, savobli ishlarni muntazam bajarib kelayotgan faol deputatlardan biri sanaladi.

Deputat faoliyati davomida, aholi bilan uchrashuvlarda “Mehnatobod” mahalla fuqarolar yigʻinida yashovchi aholini qiynab kelayotgan muammolardan biri – taʼmirtalab ichki yoʻllar muammosini hal etib berdi. Quvonarlisi shundaki, deputatimiz mazkur mahalladagi 1300 metr uzunlikdagi ichki yoʻllarga tosh yotqizib, mahalla ahliga qulaylik yaratib berdi.

Aytish joizki, tumandagi “Mehnatobod” mahallasida 1000 dan ziyod aholi istiqomat qiladi. Qishloq aholisi yozda chang, qishda loy koʻchalardan yurishga qiynalishar, ayniqsa, maktab bolalariga bu ancha noqulaylik tugʻdirar edi. Aholi bu xususda mutasaddilarga bir necha bor murojaat qilishgan boʻlsalar-da, murojaat ijobiy natija topmay kelayotgan edi.

Deputat Jamshid Amanovning aholi bilan yuzma yuz muloqotlari davomida fuqarolar tomonidan mazkur muammoni hal qilib berishni soʻrab murojaat qilindi.

Deputatimiz muammoni oʻrganib darhol tuman “Obodonlashtirish” korxonasi mutasaddilari bilan hamkorlikda muammoga amaliy yechim topdi. Deputatimizning xayrli ishi — mahalla ahlining ogʻirini yengil qilgani mahalladoshlar quvonchiga quvonch qoʻshdi.

Habib Normurodov, “Mehnatobod” MFY fuqarosi:

- Bizning “Mehnatobod” mahalla fuqarolar yigʻinida joylashgan hudud ichki yoʻllariga avval yaxshi taʼrif berish mushkul edi. Hududimizda mingdan ortiq aholi istiqomat qiladi. Ichki koʻchalardagi oʻydim-chuqur yoʻllar yoʻlovchi-yu haydovchiga birdek noqulaylik tugʻdirardi. Ahvol qor-yomgʻirli kunlarda, ayniqsa, ogʻirlashardi. Mana bugun koʻchalarimiz obod boʻldi. Mahalladoshlarimizning quvonchi cheksiz. Ogʻirimizni yengil qilib, yoʻllarimizni ravon boʻlishiga hissa qoʻshgan deputatimizga cheksiz minnatdorchiligimizni bildiramiz.

Shuningdek, xalq bilan muloqot davrida deputatimiz tumandagi kam taʼminlangan, ijtimoiy himoyaga muhtoj oilalarga gʻamxoʻrlik, mehr-muruvvat koʻrsatish, aholi farovonligi, tinchligi va totuvligi taʼminlashdek xayrli ishlarda oʻzining beminnat yordamini ayamay kelmoqda. Bunday xayrli ishlarda deputat Jamshid Amanovning hamisha bosh-qosh boʻlayotganligi partiyamizning ham mavqeyi baland boʻlishida katta ahamiyat kasb etadi.

Dildora Yoʻldosheva,

Oʻzbekiston “Adolat” SDP

Muzrabot tuman “Yosh adolatchilar” qanoti Kengashi faoli