Deputatlar aholini referendumga faol qatnashishga chorlamoqdalar

Namangan viloyatida shu yil 30 aprelda oʻtkaziladigan umumxalq referendumiga qizgʻin tayyorgarlik koʻrilmoqda. Muhim siyosiy tadbirni oʻtkazish boʻyicha okrug va uchastka komissiyalari ish olib bormoqda. Aholi oʻrtasida targʻibot-tashviqot ham tobora kuchaytirilmoqda. Bu borada “Adolat” SDPdan saylangan deputatlar faolliklari bilan ajralib turibdilar.

Masalan, Oliy Majlis Qonunchilik palatasi deputati Dilmurod Ismoilov oʻtgan haftada Namangan davlat universitetida tashkil etilgan davra suhbatida qatnashdi. Uning yangi tahrirdagi Konstitutsiya loyihasi qanday tayyorlangani, unda belgilanayotgan xalqchil normalarning mazmun-mohiyati yuzasidan berib o'tgan ma'lumotlarini uch yuzga yaqin talaba-yoshlar katta qiziqish bilan tinglashdi.

Deputatning Davlatobod tumanidagi “Yangi tong” mahallasida yashovchi aholi bilan hududdagi MFY idorasi yonidagi ochiq maydonda oʻtgan muloqoti interfaol usulda tashkil etildi.

Bu, hammaga oʻzini qiziqtirgan savollarga javob olish imkonini berdi.

Xalq deputatlar “Adolat” SDP guruhi aʼzosi Saidolim Abdurahmonov ham targʻibot ishlarida faol. U Namangan pedagogika kolleji jamoasi bilan uchrashdi. Asosiy Qonun loyihasi haqidagi mulohazalar, kiritilgan oʻzgarishlarning ahamiyati toʻgʻrisidagi fikrlar hammaga maʼqul tushdi. Bundan tashqari, u yangilanayotgan Bosh Qomusga bagʻishlangan maqolasini “Namangan haqiqati” gazetasida chop ettirdi. Hozir mahalliy televideniyeda chiqish qilishga tayyorlanmoqda.

Xalq deputatlari Pop tuman kengashi deputati Maftunahon Mamatova oʻz saylov okrugi hududidagi mahallalarda uchrashuvlar oʻtkazmoqda. Xonadonlardagi suhbatlarda yangilangan Konstitutsiya loyihasining mazmun-mohiyati bosh mavzu boʻlmoqda. Deputat bir hafta davomida toʻrt yuzdan ziyod kishilar bilan muloqot qilgani diqqatga sazovordir.

— Xalqimiz Konstitutsiyaga kiritilayotgan oʻzgarishlarning mohiyati va zaruriyatini chuqur anglab yetmoqda, — deydi M.Mamatova. — Bu, albatta quvonarli hol. Targʻibot koʻlamini kengaytirishni maqsad qildik oʻzim ishlaydigan 31-maktabda ijtimoiy fanlar oʻqituvchilaridan iborat guruh ham tuzdik. Uning aʼzolari oʻzlari yashaydigan mahallalar aholisi bilan Bosh Qomus haqida suhbatlar oʻtkazishga kirishdilar.

Nurbek ABDULLAYEV,
“Adolat” SDP Namangan viloyat
Kengashi matbuot kotibi.