Deputatlar – iqtisodchilar huzurida

Yangi tahrirdagi Konstitutsiya loyihasi targʻiboti Namangan viloyatida qizgʻin davom etmoqda. Bu jarayonda “Adolat” SDP dan saylangan deputatlar faol qatnashmoqdalar. Misol uchun parlamentdagi fraksiyamiz aʼzosi Dilmurod Ismoilov ham saylovchilar huzurida boʻlib, yurtimizda shu kunlarda dolzarblik kasb etgan mavzu yuzasidan oʻz fikrlarini bayon etmoqda. Yaqinda Qonunchilik Palatasi deputati iqtisodiyot va moliya kambagʻallikni qisqartirish va bandlik, soliq boshqarmalari xodimlari huzurida boʻldi. Uchrashuvda umumxalq referendumi yangilanayotgan konstitutsiya loyihasi bosh mavzu boʻldi. Tadbir xalq deputatlari viloyat kengashidagi “Adolat” SDP guruhi bilan hamkorlikda tashkil etildi. Partiyadoshlarimiz — parlament aʼzosi Dilmurod Ismoilov va viloyat kengashi deputati Saidolim Abdurahmonovning maʼruzalari barchada katta qiziqish uygʻotdi.

Ular Bosh qomusni yangilash zarurati va shuningdek, unga kiritilgan modda va normalarning Yangi Oʻzbekiston jamiyatida tutadigan oʻrni xususida aniq va batafsil maʼlumotlar keltirishdi. Taʼkidlandiki, Konstitutsiyaning bu matni olim-u mutaxassislar tomonidan faqat kabinetlarda emas, balki, dastavval ikki bosqichda xalqimizning fikr-takliflarini oʻrgangan holda yaratildi.

Xoʻsh, buning qanday hayotiy zarurati bor edi? Bu savol deputatlar tomonidan shunday izohlandi: oxirgi yillarda iqtisodiyot, inson huquqlari, odil sudlov, soʻz va eʼtiqod erkinligi, ijtimoiy himoya sohalaridagi yuzlab cheklovlar olib tashlandi; naqd pul, valyuta, kredit masalalaridagi muammolar hal etildi; ayniqsa, yon va qardosh qoʻshnilarimiz bilan oramizda qariyb 25 yil toʻsiq boʻlgan “muzlar eritildi”. Albatta, shu va boshqa ijobiy harakatlar ortga qaytmasligining konstitutsiyaviy himoyasini taʼminlash zarur. Bu yutuqlar, huquq va erkinliklardan nafaqat hozirgi, balki kelajak avlodlarimiz ham emin-erkin foydalanishi uchun, ularni, albatta, Konstitutsiyada muhrlab qoʻyish talab etilmoqda.

Tadbir yigʻilganlar uchun ana shunday mazmun va mohiyatni ochib berdi.

Nurbek Abdullaev, 

“Adolat” SDP Namangan viloyat Kengashi matbuot kotibi.