Diabetdan saqlanish oʻzingizga bogʻliq

Qandli diabet aholi orasida keng tarqalgan kasalliklardan biri. Xastalikning asosiy sababi sogʻlom turmush tarziga rioya qilmaslikdir. Shu sabab har yili dunyoda 14-noyabr — Xalqaro diabetga qarshi kurash kuni sifatida keng nishonlanadi.

Oʻzbekiston “Adolat” SDP Andijon viloyati kengashi va Andijon viloyat endokrinologiya dispanseri hamkorligida “Sogʻlom turmush tarzi yoʻlida birlashaylik” loyihasi doirasida Andijon shahrida oʻtkazilgan tadbirda yuqoridagilar qayd etildi. Barkamol avlod MFYda yashovchi fuqarolar bilan suhbat kasallikni oldini olish va sogʻlom hayot kechirishga bagʻishlandi. Unda soʻz olgan dispanser bosh shifokori vazifasini bajaruvchi Iqboljon Ibrohimov qandli diabet haqida tushuncha berdi. U taʼkidlaganidek, kasallikning 2-turi koʻproq tarqalgan. Xavflisi 1-turi hisoblanadi. Sababi u koʻproq bolalar va oʻsmirlar orasida uchraydi. Agar oʻz vaqtida davolash choralari koʻrilib, nazoratga olinmasa, bemor koma holatiga olib kelishi mumkin. Ayni shu maqsadda yigʻilganlarga sogʻlom turmush tarziga amal qilish, toʻgʻri ovqatlanish va kasallikdan saqlanish yuzasidan tushuncha berildi.

MFY guzarida tashkil etilgan tibbiy koʻrik doirasida qandli diabetda ovqatlanish tartibi xususida mutaxassislar maslahat berdi. Diabetni oldini olish maqsadida qondagi qand miqdorini aniqlash tekshiruvlari ishtirokchilarni oʻz salomatliklariga boʻlgan ishonchini oshirdi, kasallik belgilari aniqlanganlar davolanishga yoʻnaltirildi.

Iqboljon Ibrohimov, Andijon viloyat endokrinologiya dispanseri bosh shifokori vazifasini bajaruvchi:

-Qandli diabet kasalligining davo choralari koʻp. Bemor doimiy ravishda parhezda boʻlishi, qand miqdorini pasaytiruvchi vositalarni isteʼmol qilib borishi, jismoniy faollikni oshirishi zarur. Diabetga chalingan kishilarda yoshidan qatʼi nazar, u yoki bu darajada jismoniy yuklama boʻlishi lozim.

Sir emas bugun mazkur kasallikdan bolalar ham holi emas. Bu albatta tashvishli. Shunday boʻlsa-da, ularga eʼtibor va gʻamxoʻrlik koʻrsatish dolzarb vazifa.Ayni shu maqsadda bayramona bezatilgan dasturxon atrofida jam boʻlgan bolajonlar koʻngliga quvonch olib kirildi. Bayram munosabati bilan “Adolat” SDP va homiy tashkilotlar tomonidan ularga sovgʻalar ulashildi.

“Adolat” SDP andijon viloyati kengashi Matbuot xizmati.