Eʼtirofga loyiq xorazmlik partiyadosh onkolog

Avval xabar berganimizdek, “Adolat” SDP Xorazm viloyat Kengashi tashabbusi bilan “Eʼzoz va eʼtibor” loyihasi doirasida partiya tizimida faollik koʻrsatib, mamlakatimiz rivoji uchun sharafli va mashaqqatli  mehnati bilan xalqimiz  hurmat-eʼtiboriga tushib kelayotgan partiyamiz fidoiy aʼzolarining mehnatlarini qadrlash va ehtirom koʻrsatish hamda ularning hayot yoʻllari va faoliyatini ommaviy axborot vositalari, internet ijtimoiy tarmoqlar orqali xalqimizga namuna sifatida koʻrsatilib kelinmoqda.

Bu gal Respublika ixtisoslashtirilgan onkologiya va radiologiya ilmiy-amaliy markazi Xorazm filialining onkolog shifokori, partiyamiz faoli Nargiza Abdullyevaning faoliyatiga toʻxtaldik.Nargiza Abdullayeva, suhbatdosh:

Yoshligimdan shifokor boʻlishni orzu qilardim. Bu maqsad meni shu yoʻnalishdagi oliy taʼlim dargohiga boshladi. Toshkent tibbiyot akademiyasi Urganch filialiga hujjat topshirdim. Talabalik davrimda amaliyot oʻtash paytida oilalar ahvolini oʻrganishga ham toʻgʻri keldi va tibbiy koʻrikdan oʻtkazish vaqtida ularning ayrimlarida oʻsma kasalligi borligi ayon boʻlardi. Bunday bemorlarni koʻrganimda menda ularga yordam berish istagi kuchayib borardi. Keyinchalik aynan onkologiya sohasida oʻqishim kerakligini his qildim va yoʻnalishimni oʻzgartirdim. Oʻqishdan keyin faoliyatimni Respublika ixtisoslashtirilgan onkologiya va radiologiya ilmiy amaliy tibbiyot markazi Xorazm filialida boshladim. Bu dargohda oʻz kasbining fidoiy insonlari faoliyat yuritadi. Ulardan kasbim boʻyicha muhim jihatlarni oʻrgandim.

Roʻzmat Gʻofurov, onkolog shifokor, boʻlim mudiri:
– Shogirdim Nargiza Abdullayeva besh yildan buyon filialimizda faoliyat olib kelmoqda. Shu davr ichida N.Abdullayeva oʻz ustida ishlab, har tomonlama yuksalib borayotgani, ishga boʻlgan yondashuvi, yangiliklarga qiziquvchanligi, bemorlarga va jamoaga boʻlgan hurmat – eʼtibori, insoniyligi va boshqa samimiy jihatlari natijasida nafaqat jamoamiz balki, xalqimizning ham hurmat -eʼtiboriga tushib bormoqda. Nargiza Abdullayeva shifokorlik vazifasi bilan bir qatorda Toshkent Tibbiyot akademiyasi Urganch filialida tahsil olayotgan xorijlik talabalarni ham onkologik kasalliklar boʻyicha bilim va koʻnikmalarini oshirib bormoqda.

Suhbat davomida hindistonlik talabalarning u haqdagi samimiy soʻzlarining guvohi boʻldik.Sanal Shit, hindistonlik talaba, suhbatdosh:

Biz Toshkent tibbiyot Akademiyasi beshinchi kurs talabalarimiz. Onkologiya yoʻnalishi boʻyicha dars mashgʻulotlarini Nargiza Abdullayeva bilan boshladik. U darsni onkologiya xizmati bilan bir qatorda, markazning xirurgiya, mammalogiya va boshqa boʻlimlarida boʻlib bemorlarning holati bilan ham tanishdik. Oʻzbekistonda onkologiya sohasini rivojlantirish va bu borada tashkil qilinayotgan tibbiy xizmatlar boʻyicha ham koʻplab maʼlumotlarga ega boʻlmoqdamiz. Onkologiya boʻycha bilim berib kelayotgan oʻqituvchimizdan minnatdormiz.
Shuningdek, kadrlar salohiyatini oshirish borasida mamlakatimiz boʻyicha 150 dan ortiq yosh mutaxassis Janubiy Koreya, Turkiya, Fransiya, Portugaliya, Rossiya, Belarus kabi davlatlarda malaka oshirib qaytdi. Soʻnggi uch yil ichida tizimdagi 150 nafar mutaxassis nufuzli xorijiy klinikalarda davlat hisobidan malaka oshirgan. Ular orasida xorazmlik Nargiza Abdullayevaning ham borligi quvonarlidir.
Bir soʻz bilan aytganda, hayotimiz va salomatligimiz yoʻlida xizmat qilayotgan Nargiza Abdullayeva singari sharafli kasb egalarini har qancha eʼtirof etsak arziydi.
Vohada loyihamiz davom etadi.

Zamira Abdullayeva,
“Adolat” SDP Xorazm viloyat Kengashi matbuot kotibi.