“Eli  suygan bandaman”

Respublika maʼnaviyat va maʼrifat markazi Kattaqoʻrgʻon tuman boʻlinmasi, Oʻzbekiston “Adolat” SDP Kattaqoʻrgʻon tuman Kengashi, ayollar targʻiboti guruhi aʼzolari tumanda qirq yildan ortiq muddat xalq taʼlimi tizimida faoliyat yuritib salkam yuz bilan yuzlashayotgan pir-u badavlat onaxonlarimizdan biri Payshanba shaharchasi “Doʻstlik” mahallasida yashovchi 1939-yilda tugʻilgan 93 yoshli maʼrifatli onaxonimiz Tursuntosh ona Elova bilan suhbatda boʻldik. Har bir soʻzi hikmatga teng, oftob chehra nigohlarida donishmandlik ufurib turgan Tursuntosh ona bilan oʻtgan gal Navroʻz arafasida tuman hokimi Jamshid Toʻlqinovich nomidan “Yoshlarni maʼnaviy barkamol, umuminsoniy qadriyatlarga muhabbat ruhida tarbiyalashda ibrat maktabi boʻlganligi uchun” tashakkurnomasini bergani kelganimizda vaqt tigʻizligi sabab “yanagi safar albatta suhbatlashishga vaqt topamiz” deb vaʼda bergan edik. Tursuntosh ona umrguzaronlik qilayotgan oila “Payshanba” shaharchasining eng namunali xonadonlaridan biri hisoblanadi. Tabarruk onaxon sulolasining oʻttizga yaqini taʼlim tizimida faoliyat yuritadi.

“Farzand tarbiyasida birinchi oʻrinda onalar ibrat boʻlishi kerak. Qachonki ona tarbiyali, oqila, farosatli, maʼnaviy boy boʻlsa u oilaning biror farzandi noqobil boʻlmaydi. Enam rahmatli goʻrlariga nur yogʻsin, rahmat yogʻsin juda maʼnili ayol boʻlgan. Kichkinaligimizdan hunarga, kitobxonlikka oʻrgatgan. Temir intizom bilan katta boʻlganmiz. Bir minut bekorchi boʻsh vaqtimiz boʻlmagan.

Biz ulgʻaygan mahallar “qoʻshni haqi” degan chiroyli udum bor edi. Qozonimizda quyuqroq ovqat, tandirda somsa, pichak pishdi deguncha qoʻshniga uzatardik. Qoʻshni bolalarni opichlab katta qilganmiz. Onajonim oqila ayol boʻlganlar. Roʻzgʻor tutimi, mehmonlarga munosabat, oqilalik, farzandlarga koʻrgazmali ibrat boʻlish ulardan meros. Kelgan mehmonni xushnudlik bilan kutib darvozagacha kulib kuzatib qoʻyish haliyam amalda.

Hayotimdan nolimayman, xudoga shukur, toʻqqiz farzand, uch oʻgʻil, olti qizim, nevara-chevara, avaralarim bilan yuzga yaqinlashdik. Haliyam kitob oʻqiyman, oʻtirib qolmaslik uchun yurib turaman. Katta qizim Muhabbatxon 73 da, nevaram 53 da, chevaram 33 da, avaram 15 ga chiqib qoldi. Mahalla kuy, yaqinlarim eʼzozida, ardogʻidaman. Mohiya qizim (Kattaqoʻrgʻon tumani 4- maktabning eng faol muallimasi, koʻp yillar mahalla tizimida faoliyat yuritgan eng namunali oila egasi) bir kuni bitta tadbirga olib bordi. Mikrofon berdi, gapirdim.Uyimizga quti berib yuboribdi. Menga qara, davlat har oy pulimni berib turibdi. Koʻtar, buningni,bunaqa ishlaringni qaytib koʻrmayin dedim. Tinchligimizni qoʻriqlayotganlarni, shu chiroyli kunlarni shukrini aytib charchamayman. Eli suygan bandaman, chiroyli yashash shuda bolam.

Ha, aytgancha farzandlarga oʻgʻilmi, qizmi hunarni yoshlikdan oʻrgatish kerak.Qizlarni oʻqitish shart. Qoʻlida puli boʻladi, oʻzi pul topgach tejab, tergab ishlatishni yoshligidan bolasiga singdiradi. Iqtisod yaxshi boʻlgach oilada muhit yaxshi boʻladi, ajrimlar boʻlmaydi.Til oʻrgatish, kitobni yaxshi koʻrishni emas, oʻqib uqishni oʻrgatish kerak”...

Tursuntosh onaning har biri tilloga teng oʻgitlari, oʻktam ovozi sergak torttirdi. Mana oqila, maʼrifatli ayolning hayotiy xulosalari. Tursuntosh onaning jamiyatda maʼrifatli ayollar amal qilishi lozim boʻlgan xulosalardan oʻrinli foydalanishimiz kerakligini koʻrinib turibdi.

Aziza Boymuradova,

Xalq deputatlari Kattaqoʻrgʻon tuman Kengashiga “Adolat” SDPdan saylangan deputat.