Energiya samaradorligini oshirish masalasiga alohida eʼtibor qaratildi

Soʻngi yillarda yurtimizda olib borilayotgan keng koʻlamli islohotlar, hayotiy dasturlarning tub mohiyatida odamlarning chin maʼnoda baxtli va farovon hayot kechirishi, inson qadrini ulugʻlash kabi masalalar asosiy tamoyil etib belgilangan. Odamlarning yaxshi yashashi uchun eng zarur manbalardan biri esa bu energiyadir. Bu sohada qilinayotgan ishlar samarasi oʻlaroq, energiya tizimidagi uzilishlar sezilarli darajada kamayib bormoqda. Lekin, kuz-qish mavsumida aholining energiyaga boʻlgan ehtiyoji keskin oshishi sababli barcha ogʻirlik elektr tarmoqlariga tushmoqda.

Bu holatda eng toʻgʻri yoʻl koʻp qavatli uylarni, yirik zavod, korxonalarni hamda taʼlim va tibbiyot muassasalarini muqobil energiya bilan taʼminlashdir.

Davlatimiz rahbari tomonidan joriy yilning 10-fevral kuni Jizzax viloyatida sanoatni rivojlantirish va qayta tiklanuvchi energiya manbalarini koʻpaytirish masalalari boʻyicha oʻtkazilgan yigʻilishda ham quyidagi fikrlar taʼkidlandi.

Jizzax viloyatida kamida 2 ming Megavatt qayta tiklanuvchi energiya manbalari uchun salohiyat borligi, bundan foydalanib, 270 Megavattli quyosh energiyasi quvvatlarini ishga tushirish va buning hisobiga 236 million kilovatt soat elektr energiyasi ishlab chiqarilib, tanqislik ortigʻi bilan qoplanishi, oqibatida esa jami 71 million kub metr gaz tejalishi aytib oʻtildi.

Jumladan, Gʻallaorolda Birlashgan Arab Amirliklarining “Masdar” kompaniyasining 200 million dollar toʻgʻridan-toʻgʻri investitsiyasi hisobidan, 220 Megavattli yirik quyosh stansiyasi ishga tushiriladi. Kelgusi yilda bu stansiya toʻliq quvvatga chiqib, 500 million kilovatt soat elektr olinadi va viloyat ehtiyojining 20 foizini qoplaydi.

Shuningdek, ijtimoiy soha va davlat idoralari binolarida 5 Megavattli, Sanoat zonasi va tadbirkorlar binolarida 15 Megavattli quyosh panellari oʻrnatish mumkinligi koʻrsatib oʻtildi. Aholi xonadonlariga 8 Megavattli qayta tiklanuvchi energiya manbalarini oʻrnatish uchun jozibador sharoitlar yaratiladi. Tadbirkorlarning oʻz ehtiyojlari uchun 5, 10, 15 Megavattli quyosh stansiyalari qurish tashabbuslari qoʻllab-quvvatlanadi.

Zafarobodda bu yil jami 2 Megavattli 2 ta kichik GES quriladi va bu yil 2,4 million kilovatt soat elektr energiyasi ishlab chiqaradi. Osiyo taraqqiyot banki bilan birga, Forishda 150 Megavattli yirik quyosh stansiyasi loyihasi boshlanadi. Bu stansiya toʻliq quvvatga chiqqanda, 370 million kilovatt soat elektr ishlab chiqaradi. Jizzax shahrida ham issiqlik, ham elektr energiyasi ishlab chiqaruvchi kogeneratsiya markazi quriladi.

Yigʻilish davomida Davlatimiz rahbari viloyat jamoatchiligi vakillari, nuroniylar va yoshlar bilan muloqot qildi. Ular yurtimizdagi yangilanishlar, yaratilayotgan sharoitlar samarasi haqida oʻz hayoti va faoliyatidagi muvaffaqiyatlar misolida soʻzlab berdi. Davlatimiz rahbari tomonidan ularning taklif va tashabbuslari tinglanib, mutasaddilarga tegishli topshiriqlar berildi.

Orif SHUKUROV,
“Adolat” SDP Jizzax viloyat Kengash raisi