Eng munosiblar saralab olindi

Xabaringiz bor, joriy yilning 23-yanvar kunidan 6-fevral kuniga qadar Oʻzbekiston “Adolat” sotsial-demokratik partiyasidan Oʻzbekiston Respublikasi Oliy Majlisi Qonunchilik palatasi huzuridagi Yoshlar parlamentiga aʼzolarni saylash uchun yoshlarning hujjatlarini qabul qilish ishlari olib borildi.

Mazkur saylovni oʻtkazish Nizomiga asosan 6-fevral kuni 1-bosqich yaʼni yoshlarning hujjatlarini qabul qilish jarayonlari yakunlanib, tashkiliy qoʻmita aʼzolari tomonidan nomzodlardan qabul qilingan hujjatlar Saylov hayʼatiga taqdim qilindi.

Bugun 7-fevral kuni Ellikqalʼa tumanida Qoraqalpogʻiston Respublikasidagi 3-Ellikqalʼa saylov okrugidan Yoshlar parlamentiga hujjat topshirgan nomzodlarning Saylov hayʼati aʼzolariga oʻz saylovoldi dasturlarining taqdimoti oʻtkazildi.

Bunda nomzodlarning qonunchilik sohasidagi bilimi va koʻnikmalari, qonunchilikni takomillashtirish boʻyicha asoslantirilgan takliflari hamda siyosiy partiya faoliyatidagi faollik darajasiga alohida eʼtibor qaratilib, Saylov hayʼati tomonidan adolatli baholangan holda, nomzodlar ichidan munosiblari saralab olindi.

Bugungi oʻtkazilgan saylov natijalariga koʻra nomzodlarning eng koʻp ball toʻplagan 3 nafari yaʼni, J.Erkaev, D.Xakimboev va A.Jumaniyazovalar Saylov hayʼati tomonidan eng munosiblar, deb topilib, hujjatlari partiya Siyosiy Kengashi Markaziy apparatida tuzilgan Respublika Tashkiliy qoʻmitasiga taqdim etildi.

Endilikda ushbu saralangan nomzodlar saylovning yakuniy 3-bosqichi yaʼni, 15-22-fevral kunlari oʻtkaziladigan respublika bosqichida ishtirok etadi.

Oʻzbekiston “Adolat” SDP
Qoraqalpogʻiston Respublikasi Kengashi
matbuot xizmati