Fargʻonada -xalqaro onlayn konferensiya

Fargʻona davlat universiteti qoshidagi Gender tengligi tadqiqotlar markazi tashabbusi bilan “Turkiy xalqlar milliy urf –odatlarining avlodlararo vorisligini taʼminlashda xotin-qizlarning oʻrni ” mavzusida xalqaro onlayn konferensiya tashkil etildi. Viloyat hokimligi, Oliy Majlis Senati, respublika Gender tengligi komissiyasi, Oliy taʼlim, fan va innovatsiyalar vazirligi, Fargʻona davlat universiteti, viloyat Oqila ayollar harakati hamkorligida oʻtkazilayotgan ushbu xalqaro onlayn konferensiyada xorijiy davlatlar elchixonalari, ekspertlar, respublikamiz va xorijdagi yetakchi oliy taʼlim muassasalari professor-olimlari ishtirok etdilar.

Jumladan, Pokiston, Turkiya, Ozarbayjon, Qirgʻiziston kabi davlatlarning nufuzli oliygohlarning professor -oʻqituvchilari oʻz maʼruzalari bilan onlayn qatnashdilar. Unda gender tenglikka erishishda demokratik qadriyatlar, professional taʼlim muassasalarida tahsil olayotgan oʻquvchilarni milliy urf –odatlar ruhida tarbiyalash mexanizmlari kabi dolzarb mavzular oʻrin olgan.

Xabaringiz bor, bundan ikki yil avval Markaziy Osiyo mamlakatlari va Birlashgan Millatlar Tashkilotining bir guruh ayol rahbarlari yangi platforma — Lider-ayollar oʻrtasida Markaziy Osiyo muloqotini yaratish tashabbusi bilan chiqqan edilar. Xalqaro hamkorlik doirasida olib borilayotgan ishlar samaradorligi yil sayin ortib bormoqda. Oʻzbekiston davlati miqyosida olib qaralganda, mamlakatimiz ayollarining har bir sohada yanada faolligiga erishish, ularning farovon turmush kechirishlarini taʼminlash, ilm-fan, boshqaruv, siyosatda munosib ishtiroklarini taʼminlash va xotin-qizlarning yutuq va tajribalari almashish doirasida maqtovga sazovor ishlar amalga oshirilgan.

Xalqaro konferensiya yakunida kelgusidagi maqsad va vazifalar belgilab olindi.

“Adolat” SDP Fargʻona viloyat Kengashi Matbuot xizmati.