Farzandingiz zoʻravonlikning qurboni boʻlmasin

Hozirda jamoatchilik muhokamasida boʻlgan “Bolalarni zoʻravonliklarning barcha shakllaridan himoya qilish toʻgʻrisida”gi qonun loyihasini oddiy bir holatda oʻqish qiyin. Unda koʻtarilgan masala oʻta dolzarb va eʼtiborli. Negaki gap ertamiz egalari, barchamizning kelajagimiz haqida bormoqda.

Oʻzbekiston “Adolat” SDP Andijon viloyati kengashi tomonidan Andijon davlat tibbiyot institutida qonun loyihasi muhokamasiga bagʻishlab tashkil etilgan davra suhbatida taʼkidlanganidek, har birimiz bu masalaga eʼtibor bilan qarashimiz lozim. Unda belgilangan vazifalar zimmamizga katta masʼuliyat yuklaydi. Ijtimoiy tarmoqlarda kuzatilayotgan bolalar bilan bogʻliq koʻngilsiz voqeliklar ham qonunning qabul qilinishini talab etmoqda.

Nasibaxon Toʻychiyeva, xalq deputatlari Andijon viloyati kengashi deputati:

-Bu borada birgina bolalarga jismoniy yoki jinsiy zoʻravonlikni tushunish bilan chegaralanish mumkin emas. Hatto gʻamxoʻrlik koʻrsatmaslik, ekspluatatsiya va bulling xolatlari ham endi kechirilmaydi. Yana bolaning hayoti va sogʻligʻi bevosita xavf ostida qolganda vakolatli organ bolani ota-onadan yoki ularning biridan, oʻz qaramogʻiga olgan boshqa shaxslardan zudlik bilan olishga haqliligi belgilanmoqda.

Farhodbek Otaxonov, Demokratik jarayonlarni tahlil qilish markazi Andijon viloyati hududiy boʻlinmasi rahbari:

-Ochigʻi bu mavzuda soʻz ochishning oʻzi ogʻir. Ayniqsa ayrim oilalarda ota-onalarning farzandlariga nisbatan tazyiq oʻtkazishini kechirib boʻlmaydi. Ushbu qonunning qabul qilinishi bolalarni zoʻravonlikning barcha shakllaridan himoya qilish sohasidagi munosabatlarni tartibga solish, bolalar huquqlari, erkinliklari va qonuniy manfaatlariga rioya etish hamda ularni hurmat qilishning huquqiy asoslarini takomillashtirish, bolalarga nisbatan zoʻravonlik holatlariga keskin va murosasiz munosabatda boʻlish, zoʻravonlik sodir etgan shaxslarga nisbatan javobgarlikning muqarrarligini taʼminlashga xizmat qiladi.

Davra suhbati yakunida partiya faollari, mahalliy kengash deputatlari va hamkor tashkilotlarning vakillari jamoatchilik orasida qonun loyihasini keng targʻib qilishga qaror qildilar.

“Adolat” SDP Andijon viloyati kengashi

Matbuot xizmati.