Fidoyi tibbiyot xodimlari taqdirlandi

Mamlakatimizda jamiyatimizning barcha jabhalari singari tibbiyot tizimida amalga oshirilayotgan keng koʻlamli islohotlar xalqimiz salomatligini mustahkamlash, profilaktika, diagnostika va davolash ishlari samaradorligini oshirishda muhim omil boʻlyapti. 2006-yil 12-sentyabrda qabul qilingan “Oʻzbekiston Respublikasi tibbiyot xodimlari kunini belgilash toʻgʻrisida” qonunga muvofiq mamlakatimizda noyabr oyining ikkinchi yakshanbasi shifokorlarning kasb bayrami kuni sifatida har yili tantanali nishonlanib kelinadi.

“Adolat” sotsial-demokratik partiyasi elektoratining asosiy qismini tibbiyot xodimlari tashkil etadi.Shu jihatni hisobga olib xar yili bu bayram koʻtarinki ruhda nishonlanib kelinmoqda.

Shifokorlik bu nafaqat maqom va kasb. Balki katta masʼuliyat, mushkul va kutilmagan voqeliklarga doimo tayyor boʻlishlik, atrofdagilar dardini his etib, ularga oʻz vaqtida yordam bera olishlik, fidoiylikdir.

Joriy yilning 11-noyabr Guliston shahar “Navroʻz” toʻyxonasida viloyatimizdagi tibbiyot xodimlari uchun bayram tadbiri tashkil etildi.

Tadbir davomida viloyat hokimi Akmaljon Mahmudaliyev ularga Oʻzbekiston Respublikasi Prezidenti Shavkat Mirziyoyev yoʻllagan tabrikni oʻqib eshittirdi. Shuningdek, bugungi kunda tibbiyot sohasiga qaratilayotgan eʼtibor, bu yoʻnalishda yaratilgan shart-sharoitlar hamda viloyatda erishilayotgan yutuqlar xususida atroflicha toʻxtaldi.

Samimiy tilaklar bildirilib, sohaning eng faollariga davlatimizning yuksak orden va medallari, “Sogʻliqni saqlash aʼlochisi” hamda ”Sirdaryo viloyatining 60 yilligi” koʻkrak nishonlari tantanali topshirildi.

Bayram tadbirida partiyamiz faol aʼzolari tibbiyot xodimlariga “Adolat” SDP Sirdaryo viloyat Kengashi,Guliston va Sayxunobod tuman Kengashi raislari Sh.Umurzoqova va M.Berdievalar tomonidan partiyamiz esdalik sovgʻalari topshirildi.

“Adolat” SDP Sirdaryo viloyat kengashi Matbuot xizmati.