Fuqarolarni huquqiy bilimlarini oshirish lozim

Fuqarolarda huquqiy bilimlarni kuchaytirish lozimligi hozirgi kunning eng dolzarb masalasi desak yanglishmagan boʻlamiz.Chunki fuqarolardan firibgarlarga aldanib qolinishi yuzasidan koʻp murojaatlar kelib tushmoqda.Subsidiya asosida uy olib beraman deb fuqarolardan pul olib, yoʻq boʻlib ketgan firibgarlar oramizda uchrab turibdi.

Fuqarolarimizda huquqiy bilimlarni yetarli emasligi, xar qanday ishni advokat yoki yuristlar bilan maslahatlashib qilish kerakligini, afsuski kech bilishmoqda. Fuqorolarni na ish joyi, manzili yoʻq shaxslarga pullarni ishonib topshirishlari, naqd shaklda yoki bank kartasiga oʻtkazib berishlari, ularda hech qanday notarial holatda berilmaganligi, keyinchalik pul oldi-berdisi holatini isbotlashda qiyinchiliklarga, oxir oqibat pullariga chuv tushib qolayotganliklari ayni haqiqatdir.

Sirdaryo tumanida vaqtincha ijarada yashayotgan fuqaro Shiranova Marxabo subsidiya asosida Toshkent shahridan uy olib berish evaziga qurilish firmasi egasiga 1000 AQSh dollari berib, hozirda uy ololmagani, pulni olgan quruvchi yoʻq boʻlib qolganligi yuzasidan viloyat Kengashi deputati S.Elmurodovga murojaat qilgan, pul olganligi yuzasidan hech qanday xat-hujjat qilmagan fuqaro hozirda, pulini ololmay sarson boʻlmoqda.

Yana bir holat, Guliston shahri hududida arzon narxlarda koʻp qavatli uy qurilayotganligi, qurilish firmaning bankdagi hisob raqamiga 35 million soʻmdan pul oʻtkazib hozirda aldanganligi, fuqarolardan jami 800 million soʻm miqdorda pul tushirib, hech qanday uy qurilmaganligi uchun quruvchi JK -168 moddasi bilan 7,5 yilga qamalib ketganligi holati yuzasidan Guliston shahrida ijarada turuvchi fuqaro Ramazon Xoʻjakov xam murojaat qildi.

Afsuski, statistik maʼlumotlarga koʻra, ushbu jinoyat turi Sirdaryo viloyat hududida ham sodir etilib, koʻpayib bormoqda. Sud amaliyotiga koʻra, firibgarlik jinoyatini sodir etayotgan shaxslar fuqarolarni aldashning yangi-yangi usullaridan foydalanmoqdalar. Firibgarlik jinoyatini sodir etuvchi shaxslar fuqarolarning ishonchiga kirish va ularning mol-mulkini egallash maqsadida turli aldov yoʻlari orqali, jumladan arzon uy-joy, mashina olib berishni; ishga, oʻqishga kiritib qoʻyishni, chet ellarga tanishlari orqali yaxshi pul toʻlanadigan joylarga ishga joʻnatishni, fuqarodan muayyan pul summasini olib, biznes qilish yoʻli bilan 2,3 barobar koʻpaytirib qaytarib berishni, fuqarolarga tegishli boʻlgan turli mol-mulk, buyumlar (avtomashina, uy, kvartira, tilla buyumlar, uy-jixozlari va shu kabi boshqa mulklarni )ni qimmat narxga sotib berishni va shu kabi boshqa yolgʻon vaʼda berish yoʻllari bilan fuqarolarning mulkini jinoyat yoʻli bilan egallashga harakat qilmoqdalar.

Firibgarlik jinoyati qurboni boʻlmaslik uchun oʻzga shaxslarning turli yolgʻon vaʼda va kafolatlariga ishonib qolmaslik, oʻz pul mablagʻingiz va mulkingizni boshqa shaxslarga topshirishda har taraflama chuqur xulosa qilgan holda ish koʻrishni, ushbu jinoyatdan himoyalanish birinchi navbatda xar bir fuqaro huquqiy bilim darajasiga bogʻliq ekanligini unutmaslik lozim.

“Adolat” SDP Sirdaryo viloyat kengashi Matbuot xizmati.