Fuqarolarning odil sudlovga erishish darajasi yanada oshadi

Oliy Majlis Qonunchilik palatasidagi “Adolat” SDP fraksiyasining yig‘ilishida dastlab “Davlat boji to‘g‘risida”gi O‘zbekiston Respublikasi Qonuniga ma’muriy sudlarga murojaat qilishda fuqarolarga yanada qulay sharoitlar yaratishga qaratilgan o‘zgartirish kiritish haqida”gi qonun loyihasi ko‘rib chiqildi.

Ta’kidlanganidek, keyingi yillarda mamlakatimizda sud-huquq tizimini yanada takomillashtirish, fuqarolarning huquq va qonuniy manfaatlarini ishonchli himoya qilish bo‘yicha izchil ishlar olib borilmoqda. Amalga oshirilgan ishlar fuqarolarning odil sudlovga erishish imkoniyatlarini yanada kengaytirish, ularning huquqlari va erkinliklari hamda qonuniy manfaatlarining ishonchli himoyasini ta’minlash, aholining sudlarga bo‘lgan ishonchini yanada orttirish imkonini berdi.

Ushbu qonun loyihasi fuqarolar o‘zlarining huquqlari va qonuniy manfaatlarini buzayotgan davlat boshqaruvi organlarining, ma’muriy-huquqiy faoliyatni amalga oshirishga vakolatli bo‘lgan boshqa organlarning, fuqarolar o‘zini o‘zi boshqarish organlarining, ular mansabdor shaxslarining qaror va harakatlari (harakatsizligi) ustidan ma’muriy sudlarga murojaat qilish imkoniyatlarini yanada kengaytirish, shuningdek ularga odil sudlovga erishish darajasini oshirish maqsadida ishlab chiqilgan.

Mazkur qonun loyihasi bilan fuqarolarga davlat boshqaruvi organlarining, ma’muriy-huquqiy faoliyatni amalga oshirishga vakolatli bo‘lgan boshqa organlarning, fuqarolar o‘zini o‘zi boshqarish organlarining, ular mansabdor shaxslarining qaror va harakatlari (harakatsizligi) ustidan ma’muriy sudlarga beriladigan murojaatlarining barchasi bo‘yicha davlat boji pasaytirilmoqda.

Deputatlarning aytishicha, qonun loyihasi bilan kelgusida, fuqarolarga o‘zlarining huquqlari va qonuniy manfaatlarini buzayotgan davlat boshqaruvi organlarining, ma’muriy-huquqiy faoliyatni amalga oshirishga vakolatli bo‘lgan boshqa organlarning, fuqarolar o‘zini-o‘zi boshqarish organlarining, ular mansabdor shaxslarining qaror va harakatlari (harakatsizligi) ustidan ma’muriy sudlarga murojaat qilish imkoniyatlari yanada kengaytiriladi.

Muhokamalar davomida fraksiya a’zolari partiya maqsad va vazifalaridan kelib chiqib, qonun loyihasini takomillashtirish yuzasidan bir qator takliflarni o‘rtaga tashlashdi. Loyihadagi ayrim normalar yuzasidan ko‘plab savollar ko‘tarildi.

Qonun tashabbuskorlari har bir taklif asosli ekanligini, ularning aksariyati loyihani pishiq-puxta holatga keltirish va maromiga yetkazish jarayonida inobatga olinishini qayd etdilar. Ko‘tarilgan barcha savollar yuzasidan ham aniq javoblar berildi.

Qizg‘in davom etgan baxs-munozaralar, savol-javoblar va tortishuvlardan so‘ng, qonun loyihasi deputatlar tomonidan ma’qullandi.