Gʻuzorda kuz-qish mavsumiga tayyorgarlik qanday?

Shu kecha kunduzda joylarda kuz-qish mavsumiga tayyorgarlik boshlab yuborildi.   Mavsumni har tomonlama koʻngildagidek oʻtkazish uchun korxona, tashkilot, muassasalarda katta tayyorgarlik ishlari olib borilyapti. Bu borada Gʻuzor tumanida amalga oshirilayotgan ishlar qoniqarlimi? Oliy Majlis Qonunchilik palatasi deputati Dilshod Xamzayev tumanda boʻlib shu masalalar bilan qiziqdi.

Shuni alohida qayd etish kerakki, aholi xonadonlarini elektr energiyasi bilan uzluksiz taʼminlash qish qirovli kunlarda koʻpincha muammo boʻlib qolayotir. Shuning uchun ham deputat dastlabki oʻrganishlarini tuman elektr tarmoqlari korxonasidan boshladi. Korxona bosh muhandisi Islom Jumayev hamkorligida ishlab turgan transformator va boshqa apparatlar holati oʻrganildi. Deputat 1980-yildan buyon foydalanib kelinayotgan transformatorlarni yangisiga almashtirish baʼzilarini joriy va kapital taʼmirlash yuzasidan koʻrsatmalar berdi.

Tuman gaz taʼminoti korxonasida ham bu yilgi kuz-qish mavsumiga tayyorgarlik qizgʻin olib borilyapti. Deputat gaz taʼminoti korxonasi xodimi Baxtiyor Xurramov bilan uchrashib, aholini kuz-qish mavsumida suyultirilgan gaz balonlari bilan taʼminlashga koʻrilayotgan hozirliklarni koʻzdan kechirdi. Tuman gaz taʼminoti korxonasi xodimining maʼlum qilishicha muammoga duch kelmaslik uchun barcha choralar koʻrilgan. Qoʻshimcha navbatchilik qismlari tashkil etilib, kerakli jihozlar bilan taʼminlangan.

Shu kuni deputat tumandagi 6-,4-,16- maktablarda ham boʻlib oʻquv yiliga tayyorgarlik va issiqlik tizimi ahvoli bilan tanishdi. 6-sonli umumiy oʻrta taʼlimi maktabi direktori Pets Alyona Yuryevnaning qayd etishicha maktabga 58 tonna koʻmir keltirilgan. Bu esa kuz-qish oylarida sinf xonalarini isitishga toʻliq yetadi. Bundan tashqari 4 va 16 maktab masʼullarining maʼlum qilishicha, ushbu taʼlim maskanlariga ham yetarli miqdorda qish mavsumida foydalanish uchun koʻmir keltirilgan.

Deputat tuman tibbiyot birlashmasida ham boʻlib tayyorgarlikning borishi bilan tanishdi. Eʼtiborlisi shundaki tuman tibbiyot birlashmasiga qarashli muassasalarda ham tayyorgarlik shu kun talablari asosida olib borilyapti. Markaziy shifoxona boʻlimlarida elektr energiyasi taʼminotida uzilishlar boʻlgan vaqtda 30 kvt kuchlanishli katta dvijok apparati keltirilgan boʻlib muammo darhol bartaraf etiladi. Shuningdek deputat tumandagi boshqa muassasalarda ham boʻlib kuz-qish mavsumiga tayyorgarlikning borishi bilan tanishdi va oʻzining kerakli maslahat tavsiyalarini berdi.

“Adolat” SDP Qashqadaryo viloyat Kengashi matbuot xizmati.