Halol mehnat baraka va farovonlik kaliti

Ushbu hikmatni bekorga keltirmadik. Kimdir qaysidir sohada oʻz mehnatini, iqtidorini koʻrsata olyaptimi, bu albatta, Olloh tomonidan berilgan neʼmatligini unutmasligimiz lozim. “Beka Charos” xususiy korxonasi direktori, xalq deputatlari viloyat Kengashi deputati Gulbeka Qoʻchqorova ana shunday halol mehnat orqali nafaqat oʻz oilasining balki tumanda 30 dan ortiq xotin-qizlarning bandligini taʼminlab, roʻzgʻoriga hissa qoʻshishlari yoʻlida koʻmakchi boʻlib kelayotganlardan.

Deputat oʻz faoliyati davomida siyosiy jarayonlarda xotin-qizlar faolligini oshirishga, qiyin ijtimoiy holatga tushib qolgan ayollarga madad qoʻlini uzatishga hamisha hozir. Xalq deputatlari viloyat Kengashi sessiyalarida ham bu borada oʻzining asoslantirilgan takliflarini berib tom maʼnoda partiyaning “Bir adolatchi — yuz ayolga himoyachi” loyihasini hayotga tatbiq etilishida katta hissa qoʻshib kelmoqda.

Kuni kecha “Masʼuliyatli moliya va qishloqning barqaror rivojlanishi” taʼlim loyihasi “Tadbirkor ayol” xalqaro ishbilarmon ayollar assotsiatsiyasi va Germaniyaning xalqaro hamkorlik boʻyicha jamgʻarma kassalari fondi bilan hamkorlik doirasida joylarda xotin-qizlarni tadbirkorlik faoliyatiga yoʻnaltirish masalalariga bagʻishlangan oʻquv seminarlarni tashkil etish uchun jalb etilgan malakali murabbiylar tomonidan Respublikamizning 12 ta viloyatida amaliy ishlar olib borilmoqda. Ana shunday oʻquv-seminari Pastdargʻom tumanidagi “Beka-Charos” xususiy korxonasida boʻlib oʻtdi. Seminar-treningda tadbirkorlik faoliyatini boshlash, yanada rivojlantirish istagidagi xotin-qizlar qatnashib, oʻzlariga kerakli maʼlumotlardan bahramand boʻlishdi.

Darvoqe, seminar-treningni ayni ushbu korxonada tashkil etilishi ham ishtirokchilar uchun nafaqat nazariy bilimlarni oʻzlashtirish, balki jamoa boʻlib ishlash, tajriba almashish, amaliy koʻnikmalarga ega boʻlishda ham muhim ahamiyat kasb etdi.

- 25 nafar ishtirokchi puxta oʻqitilib, ularga trenerlik sertifikatlari topshirildi, — dedi deputat, “Beka-Charos” xususiy korxonasi direktori Gulbeka Qoʻchqorova. — Ular bilan qizgʻin suhbatlardan anglash mumkinki, har birining seminardan taassurotlari katta. “Tadbirkorlik sohasiga qiziqishim bor, ammo bu masʼuliyatli sohada ish boshlash uchun avvalo, bilim, tajriba lozim. Men tadbirkorlik borasida oʻzim rejalashtirgan fikr va rejalarim, bu yerda yanada mukammallashdi. Endi bemalol bu sohada ish boshlasam boʻladi” degan ishtirokchilarning birining fikri eʼtiborimni tortdi. “Men tikuvchilik sohasida tadbirkorlikni boshlayman. Gulbeka opa, bu borada sizning maslahatlaringiz ham kerak” dedi u. Albatta, bu quvonarli. Har bir ado etiladigan ezgu harakat zamirida ishonch, mehnat, masʼuliyat va zahmat boʻlishini tushuntirdim. Yurtimizda tadbirkorlar qancha koʻpaysa, raqobat ham shuncha koʻp boʻladi. Raqobat bor joyda, yangilanish, intilish boʻladi, albatta.

Seminar-treningda tuman prokuraturasi hamda deputat G.Quchqarova tomonidan tadbirkorlik faoliyatining qonuniy yoʻl-yoʻriqlari, bu boradagi muammolar yechimi boʻyicha hayotiy misollar orqali tushuncha berdi. Chunonchi, shu oʻrinda deputat, “Beka-Charos” xususiy korxonasi direktori Gulbeka Qoʻchqorovaning endigi rejalari xususida ham soʻz yuritsak. Partiyaning dasturiy maqsad va vazifalarida xotin-qizlar borasida belgilangan ustuvor yoʻnalishlarni hayotga joriy etilishida munosib hissa qoʻshib kelmoqda. Bugungi kunda 30 dan ortiq ishchilari orasida ijtimoiy himoyaga muhtoj, nogironligi boʻlgan hamda jazoni oʻtash muassasalaridan qaytgan xotin-qizlarni ham bor, deputat ularni hayotga moslashtirish, jamiyatda oʻz oʻrnini topishlariga koʻmaklashish borasida samarali ishlarni yoʻlga qoʻygan. Deputat boshchiligidagi ushbu fayzli korxona shu kunlarda faoliyatini kengaytirish yoʻlida ildam harakat qilmoqda. Tez kunlarda yana 20 oʻrinli tikuv zali ishga tushirilish arafasida. Toʻgʻrisi oʻzim ham faoliyatim davomida “Adolat qabulxonasi”ga bandlik masalasida murojaat qilib kelgan xotin-qizlarimizni qiziqishlariga koʻra deputat koʻmagida “Beka Charos” korxonasiga ishga joylashtirgan vaqtlarim ham boʻlgan. Deputat Gulbeka Qoʻchqorovaga bu yoʻlda shijoat va kuch-quvvat tilab qolamiz. Faoliyatingiz yanada rivoj topaversin deb qolamiz.

Xonbuvi Xayitova,

Oʻzbekiston “Adolat” SDP Pasatdargʻom tuman Kengashi raisi.